- Publika iha: 13 Setembro 2024
Koordenadór Timor-Leste Coalition for Education (TLCE) Jose Monteiro, husu Ministériu Edukasaun atu hadia kualidade edukasaun iha Timor-Leste liuhusi formasaun ba profesór sira.
Nia dehan, durante ne'e formasaun ba profesór sira kona-ba material didátiku ho pedagójika ne'e profesór sira la partisipa no pior liu profesór sira iha área rurais, tanba ne'e mak kontribui ba kualidade edukasaun ladun di’ak iha Timor-Leste.
"Ita husu ba Ministériu Edukasaun atu fasilita formasaun ba profesór sira hotu kona-ba materia didátiku no pedagójika, nune'e mós ba utilizasaun komputadór ba profesór sira hodi bele hadia kualidade edukasaun iha Timor-Leste,'' nia informa.
Tanba ne'e nia dehan, bainhira prestasaun profesór sira-nia ladi’ak, nune'e koñesimentu ladun di’ak ida-ne'e kontribui ba menus kualidade edukasaun.
Nia dehan, alende formasaun kapasitasaun ba profesór sira, nune'e mós infresatrutura eskolár mós seidauk di’ak no eskola balun utiliza hela edifisiu governu Indonesia nian.
"Ita husu Ministériu Edukasaun atu tau atensaun ba asuntu sira-ne'e, atu nune'e kualidade edukasaun labele hakdasak nafatin," Koordenadór TLCE Monteiro dehan.
Entretantu Koordenadór Ensinu Báziku Filial Hans Klemm Flaviano da Costa dehan, atu hetan kualidade edukasaun di’ak presiza kria kondisaun no prepara fasilidade ne’ebé sufisiente ba estudante no profesór sira.
"Maibé ita haree kualidade edukasaun hahu lao ona,maibé seidauk másimu,tanba ne’e ita fiar katak governu sei esforsu hodi hadia lakuna sira-ne'e atu bele hadia kualidade edukasaun,” nia dehan.
Entretantu Diretór Rekursu Umanu iha Ministériu Edukasaun Anita Tavares Ribeiro de Jesus dehan, dadaun ne'e formasaun profesór seidauk realiza, tanba Ministériu Edukasaun halo hela planu atu realiza formasaun ba profesór sira.
"Ita prepara hela planu atu bele realiza formasaun ba profesór sira no ita sei identifika profesór sira atu nune'e profesór sira hotu bele hetan oportunidade hodi partisipa formasaun hahu husi nasional no área rurál," nia informa.
Tanba ne'e nia dehan, governu nafatin esforsu makas hodi hadia kualidade edukasaun liuhusi formasaun ba profesór, nune'e mós kompleta infraestrutura no fasilidade iha eskola, maibé ida-ne'e fazeadamente.