- Publika iha: 21 Setembro 2024
UN Women ho Sekretáriu Estadu Arte no Kultura (SEAK) apoiu produtu husi grupu feto rede soru na’in, nune’e bele asesu ba merkadu Nasionál no Internasionál hodi hasa'e ekonomia feto rurál.
The Country Reperezentative UN Women Nishtha Satyam dehan, apoiu ne’ebé mak UN Women hamutuk ho SEAK fó hodi fasilita sira-nia produtu hotu ne’ebé sira prodús ba merkadu.
"Ita apoiu sira-nia produtu ba merkadu ikus,maibé bele lori rendimentu ekonomia liu-liu ba iha grupu feto rede soru na’in sira iha área rural,” nia dehan.
Nia dehan, durante ne'e grupu feto rede soru na’in, sira prodús produtu ne'e barak tebes ho modelu oi-oin hanesan tais, brinkus, kelu, kadeli, pasta, karteira no seluk tan, maibé sira la lori ba merkadu.
"Ho apoiu ne'e ita suporta inan feto sira husi grupu rede soru tais lori sira-nia produtu ba merkadu nasionál no internasionál hodi hadia ekonomia rurál," nia informa.
Iha fatin hanesan, Sekretáriu Estadu Arte no Kultura (SEAK) Jorge Cristovão da Costa dehan, husi produtu tais ne'e bele fó espasu ba grupu feto soru na’in sira buka lukrutivu oinsa iha futuru bele hetan husi apoiu ne’ebé mak UN Women ho SEAK halo.
"Ita mós esforsu hela halo lejislasaun ruma hodi kontrolu sirkulasaun produtu tais nian iha merkadu, atu nune’e labele fó impaktu ba folin tais iha merkadu nasionál no internasionál," nia informa.
Enkauntu nia dehan, grupu feto rede soru na’in ne’ebé mak sai benefisiariu ba apoiu hamutuk 38, tanba grupu hirak ne'e rejistradu ona no durante ne'e halo hela atividade soru tais.
Entretantu, Prezidente Rede Soru Nain, Luciana Guterres, dehan taisne’ebé mak grupu sira prodús ne'e kualidade no kontinua prezerva tais hodi salvaguarda ba nia orijen hodi labele lakon.
“Dadaun ne’e Rede Soru Na’in ita estabelese ona iha munisípiu 7 hanesan, Viqueque, Baucau, Lautem, Bobonaru, Oecusse, Covalima no Díli, no hetan apoiu másimu husi parseriu dezenvolvimentu UN Women,” nia dehan.
Tanba ne'e nia dehan,lori grupu rede soru na’in agradese ba governu no parseiru UN Women, tanba bele apoiu ona produtu ne'e prodús husi grupu ba merkadu ho objetivu hasa'e ekonomia grupu feto soru nain iha árearurál.