Fundasaun Alola Hetan Apoiu Husi Embaxada Tailándia hodi Hakbi’it Ekonomia Feto

Diretora Ezekutiva Fundasaun Alola (FA), Maria Imaculada Guterres, hateten sira hetan opoiu ho montante $2,700 husi Embaxada Tailándia hodi suporta ba programa hakbi’it feto liuliu ba kapasitasaun grupu artezenatu sira hodi hadia kualidade produtu.

Nia dehan, osan ne’ebé Embaxada Tailándia fó apoiu, ne’e sei uza hodi ajuda kapasidade grupu arte sira, nune’e bele aumenta sira-nia kualidade produsaun.

“Husi fundu ne’e, sei uza hodi fó kapasitasaun ba grupu arte atu aumenta kualidade produsaun no diversifikasaun produtu nomós atu hakbi’it grupu ne’e hodi asesu ba merkadu liuhusi Alola natal no feira tinan klaran,” dehan nia.

Diretora Guterres hatutan, objetivu husi apoiu ne’e, atu bele kapasita no ajuda grupu artezenatu sira, atu bele hadi’a sira-nia kualidade produtu, nune’e sira bele faan sira-nia produtu sira-ne’e, liuhusi feira ne’ebé FA sei realiza.

“Objetivu maka atu hakbi’it ba iha programa ekonomia feto, ne’ebé maka Fundasaun Alola iha, liuliu kapasitasaun ba iha ami-nia gurpu artezenatu sira, kapasitasaun ba sira hadi’a produtu, diversifikasaun produtu nomós oinsá haree ba kliente sira, aleinde ne’e haree mós ba iha turnu atu bele realiza feira, babain ami halo feira rua feira tinan klaran no feira natál.

Iha feira ne’e sei fornese oportunidade ba grupu artezenatu sira atu bele lori fila-fali sira-nia produtu, ne’ebé maka sira iha, mai faan hodi bele hetan rendimentu hodi suporta sira-nia família umalaran, liuliu haree ba iha suporta oan sira-nia edukasaun nomós ba oan sira-nia nutrisaun,” hatutan Diretora.

Nia salienta, la taka oportunidade ba feto sira ne’ebé mak hakarak dezenvolve sira-nia ekonomia, liuhusi negósiu ne’ebé sira halo, tanba sira iha direitu atu bele foti desizaun rasik.

“Ha’u hanoin negósiu ba feto sira ne’e, ita labele taka oportunidade, tanba nasaun ne’e nasaun demokrásia, ema hotu-hotu sé mak iha kbi’it husi parte ne’ebé de’it, bele ajuda haforsa kapasidade feto sira nian, liuliu iha área oi-oin atu nune’e bele hakbi’it feto sira, para sira rasik bele foti desizaun ba sira-nia moris,” nia salienta.

Iha sorin seluk, Embaxadór Tailándia iha Timor-Leste, Atipat Rojanapaibulya hateten, fundu ne’ebé Governu Tailándia oferese ho objetivu atu haforsa seguransa umana no hakbi’it feto hodi hasa’e kualidade ekonomia iha Timor Leste.

“Komitmentu Tailándia nian, atu haforsa seguransa umana no hakbi’it feto no labarik sira iha Timor Leste, foka liuba aumenta sira-nia saúde, edukasaun no oportunidade ekonomia”, dehan Embaxadór Atipat.

Nia dehan, Governu Tailándia liuhusi nia embaxada iha Díli, ajuda Fundasaun Alola hahú husi tinan 2012, maské ho ajudu oituan, maibé komunidade Tailándia iha Díli partisipasaun ativu tebes iha atividade voluntáriu oioin ho intensaun atu hakbiit feto no komunidade vulneravel sira seluk iha Timor-Leste.