- Publika iha: 15 Agosto 2024
Membru FALINTIL-Forsa Defeza Timor-Leste (F-FDTL) na’in-ualunulu resin ualu (88) preparadu ona hodi partisipa apoiu misaun paz ONU nian bainhira presiza.
Komandante Sentru Instrusaun Komandante Nicolau Lobato (CICNL) Metinaro, Tenente Koronel Eugenio Guterres dehan, durante fulan ida nia laran komandu realiza ona treinamentu kona-ba operasaun apoiu paz UN nian ne’ebé hanaran Asuwain Dahuluk hodi prepara militár Timor-Leste sira molok hala'o misaun paz iha rai seluk.
Nia hatete, komandu prepara sira liuhusi treinamentu faze individu depois kontinua ba grupu kona-ba operasaun apoiu paz nian.
"Ohin ita asiste direita ona katak, ita-nia membru Falintil Forsa Defesa Timor-Leste (F-FDTL) na’in-88 ne'e preparadu ona hodi ba kumpri misaun apoiu ba ONU nian," Komandante CICNL Metinaro Koronél Guterres dehan.
Nia dehan, treinamentu ne’ebé sira partisipa ne'e hanesan faze ida ba preparasaun mentalidade, militár Timor-Leste nian, kuandu estadu ho komandu atribui tarrefa servisu atu halo misaun apoiu paz ba rai seluk hanesan forsa kontijensia sira iha mundu.
"Ita-nia membru sira preparadu ona hein de’it bainhira estadu ho komandu atribui tarrefa misaun ruma ba sentru Treinamentu Operasaun apoiu paz sira prontu ona atu ba kumpri misaun," nia informa.
Nia dehan membru F-FDTL ne’ebé komandu prepara ne'e hamutuk 88 kompostu husi komponente Terrestre no Unidade Apoiu Servisu (UAS) enjeñaria, komunikasaun no saúde militár.
Iha fatin hanesan Komandante Kompañia CTOAP, Kapitaun Antonio Pinto hatete, durante estabelese ezersísiu UN aswain dahuluk ne'e iha senáriu lubuk ida mak militár Timor-Leste husi pelutaun rua bele aprende kona-ba ezersísiu operasaun apoiu paz nia.
"Durante ne'e ami halo ona treinamentu operasaun apoiu paz ONU ne'e ba membru hamutuk pelotaun 2 ami servisu hamutuk ho militar Austrália nian hodi fasilita treinamentu operasaun apoia paz ne'e, " nia informa.
Iha parte seluk Asesor Australia ba (CTOAP), Major Benjamin Edwards hatete, Forsa Armada husi Austrália kontinua iha komitementu nafatin atu fó apoiu atividade Treinamentu ba Militar Timor-Leste kona-ba preparasaun ba Kumpri misaun ONU apoiu paz iha rai seluk.
"Ami nafatin fó asisténsia prepara treinu militár Timor-Leste hahú husi individuál no hakat ba faze treinu koletivu ne'ebé mak agora dadauk ita-boot sira bele haree ne'e signifika katak iha planu sei iha programa ida husi parte forsa defeza Austrália kontinua apoiu to'o haree hetan rezultadu katak FALINTI-Forsa Defesa Timor-Leste mós bele ba kumpri misaun ho nivél kontijente ida ne’ebé mak tuir planu ho intensaun komandu F-FDTL nian," nia dehan.