- Publika iha: 23 Setembro 2024
Diretór Ezekutivu Forum Organizasaun Non-Govenamental Timor-Leste (FONGTIL), Valentim da Costa Pinto hateten, FONGTIL nafatin halo servisu atu oinsá bele haforsa knaar sosiedade sivíl iha dezenvolvimentu nasionál hodi halo kontrolu sosiál no servisu advokasia ba governu.
Nia dehan, knaar sosiedade sivíl ne'ebé durante ne'e halo, ho objetivu atu oinsa bele halo kontrolu sosiál no halo advokasia ho governu atu nune’e bele ajuda halo mudansa liuliu iha asaun sira.
"Kna’ar sira-ne’e hotu bele justifika ita-nia knaar nu’udar sosiedade sivíl no rede ONG sira bele hala’ona’ar hodi bele haforsa ita-nia knaar hodi halo kontrolu sosiál, servisu advokasia sira ne’e ita halo bele ajuda ba mudansa sira ne’ebé ita-nia governante sira halo liu husi polítika públika.
Aleinde ne’e intervensaun servisu tékniku sira no ita nafatin konsisténsia, ita halo iha tinan hirak nia laran”. Nia esplika hafoin abertura ba atividade Seminário Nasional ho tema haforsa knaar sosiedade sivíl iha dezenvolvimentu nasionál, iha salaun CNE Kolmera, Díli.
Nia hatutan, FONGTIL nafatin haree ba knaar no ezisténsia sosiedade sivíl iha Timor-Leste to’o ne'ebé ona nomós hanesan meiu ida hodi fahe lisaun no koñesimentu ba malu.
Iha fatin hanesan Adjunta Koordenadora Gabinete apoia Sosiedade Sivíl (GASC), Yasinta Lujina hateten, Gabineti Apoiu Sosiedade Sivíl iha IX Governo sei nafatin kontinua halo kooperasaun ho sosiedade sivíl, atu nune'e bele haforsa sira-nia servisu.
"Gabinete apoia Sosiedade Sivíl Sei nafatin apoia organizasaun sosiedade sivíl, foku liu ba Fundu Transferénsia Públika nia no insáatu haforsa organizasaun sosiedade sivil ba programa ligaho Edukasaun Sivika, Promove Boa Governasaun, Empoderamentu Komunitáriu no foku ba Haforsa Instituisaun," nia dehan
Nia salienta, atu haforsa instituisaun presiza konsidera liuliu atu haforsa organizasaun sosiedade sivil sira atu nune'e bele implementa programa sira ne'ebé iha ona.
"Ha’u enkoraja sosiedade sivíl sira oinsá ita-boot sira atu aproveita oportunidade ne’ebé agora daudauk iha, liuliu ba iha gabinete ne’ebé iha hodi apoiu ba sosiedade sivíl sira-nia inisiativa oinsá atu reforsa ita-boot sira-nia instituisaun, maibé la’ós de’it atu rejistu depois iha tiha organizasaun depois hotu ona liuliu funsionamentu ho loloos hanesan organizasaun,"nia afirma.