CFP no ME Rekruta Tan Profesór 400

Komisaun Funsaun Públika (CFP) no Ministériu Edukasaun (ME) rekruta tan profesór kontratadu ba permanente hamutuk atus haat (400) hodi koloka ba eskola ensinu báziku sira.

Ministru Edukasaun Interino Domingos Lopes Lemos dehan, rekrutamentu ba profesór hirak ne'e hodi kompleta ba eskola ensinu báziku sira ne’ebé mak seidauk kompleta profesór ba materia sira.

"Ohin ita rekruta tan profesór kontratadu hamutuk 400 ba permanente hodi koloka ba ensinu báziku sira iha territóriu laran tomak," nia hatete.

Nia dehan, rekrutamentu ba profesór 400 ne'e, liuhusi konkursu públiku no kandidatu ne’ebé kompete iha vaga ne'e hamutuk 7567.

Entretantu Prezidente CFP nian Agustinho Leténcio de Deushatete, Komisaun Funsaun Públika ho ekipa tomak prepara rekursu no fasilidade hotu hodi halo rekrutamentu ba profesór tuir planu ne'ebé presiza.

"Ita garante katak prosesu rekrutamentu ne’e la haree ba interese ema ida nian no sei la iha nepotizmu no família, maibé garante de’it ba rezultadu teste ne’ebé mak iha," nia informa.

Nia dehan, CFP hala’o rekrutamentu hod iresponde ba ezijénsia Ministériu Edukasaun nian, atu kompleta profesór ba ensinu báziku sira ne’ebé sei menus profesór.

Iha parte seluk, Deputada Aliança da Conceição dehan, tuir monitorizasaun ne’ebé Parlamentu Nasionál halo liu-liu iha Postu Admistrativu Quelicai Munisípiu Baucau iha eskola balun profesór ba materia 11 anu la iha.

"Eskola ida mak la iha profesór ba mareria 11 anu nian, ida-ne'e oinsá, serake profesór ida hanorin materia rua ka tolu ne'e oinsá atu hadia kualidade edukasaun," nia informa.

Deputada ne’e dehan, espera katak rekrutamentu ba profesór 400 ne'e bele kompleta ona ba eskola sira ne’ebé mak menus liu profesór ba materia sira.