ESTV Seidauk Iha Kapasidade Atu Kompete

Diretór Ezekutivu Timor-Leste Coalition for Education (TLCE), José Monteiro, dehan, Eskola Sekundária Tékniku Vokasionál iha Timor-Leste seidauk iha kapasidade atu kompete, tanba la iha kualidade.

Nia dehan, tuir monitorizasaun ne’ebé TLCE halo ba iha Eskola Sekundária Tékniku Vokasional (ESTV) iha territóriu laran hatudu katak, maioria seidauk la iha fasilidade prátika, laiha profesór ne’ebé kualidade no infraestrutura ne’ebé mak di’ak.

"Ho situasaun hirak ne'e hatudu katak Eskola Tékniku Vokasional (ESTV) seidauk iha kapasidade ba kompetisaun," nia informa.

Nia dehan, dezafiu espesífiku sira hanesan infrastrutura, kualidade de profesór, menus rekursu umanu, ekipamentu prátika mak sai impaktu ba dezenvolviventu kaulidade ESTV iha Timor-Leste.

Nia informa, pelumenus ekipamentu prátika sira-ne'e iha, nune'e tenke disponivel ba profesór sira hanorin no estudante aprende hodi prátika, maibé ida-ne'e la iha.

"Ita-nia ekipamentus prátika la iha, fasilidade no ita-nia profesór sira la halo prátika, nune'e mós profesór ba materia espesífiku sira la iha," TLCE Monteriu informa.

Tanba ne'e nia dehen, presiza fó hanoin ba governu atu bele fasilita fasilidade sira-ne'e ba estudante sira hodi uza.

Entretantu Diretór Nasionál Sekundáriu Jerál, iha Ministériu Edukasaun (ME), Benjamin Fernandes dehan, dadaun ne'e Ministériu Edukasaun tau ona osan $175 mil hodi sosa Komputadór unidade 175 hodi distribui ba ESTV sira.

"Kada eskola ita distribui komputadór unidade 35 no laboratóriu iha ESTV hodi uza ba prátika," nia salienta.

Nia dehan, iha eskola ESTV lima hanesan ESTV 28 Novembru Becora, ESTV-GTI Becora, ESTV Maliana, Ermera no Baucau mak sei sai benefisiáriu uluk, tanba identifikadu ona katak la iha fasilidade liu no eskola seluk sei rezolve fazeadamente.

Enkuantu kona-ba formasaun kapasitasaun espesífiku ba profesór sira iha ESTV dadaun ne'e lao hela no seidauk remata no ministériu nafatin esforsu hodi hadia kualidade ba ESTV iha territóriu laran.