- Publika iha: 21 Setembro 2024
Polísia Nasionál Timor-Leste (PNTL) identifika sidadaun Pakistaun na’in-sanulu (10) sai vítima ba kazu tráfiku umanu iha Timor-Leste.
Komandante Departamentu Investigasaun Kriminál Nasionál (DIKN) Superintendente Polísia João Belo dos Reis hatete, sidadaun Pakistaun na’in-10 ne'e rekruta husi kompaña internasionál ida naran Keshavarz Great Timor Unipesial Lda ne'ebé estabelese nia baze iha Timor-Leste.
Nia dehan, halo rekrutamrntu ba sidadaun Pakistaunsira-ne’ehanesan traballadór,maibé durante sira hala'o sira-nia servisu la hetan saláriu no hetan tratamentu ladiak husi na’in ba kompaña.
"Sidadaun Pakistaun na’in hirak ne'e, mai hato'o keixa no PNTL liuhusi Departamentu Investigasaun Kriminál Nasionál (DIKN) ita halo identifikasaun ho hatudu katak, sidadaun na’in salunu ne'e vítima ba kazu tráfiku umanu no dadaun ne'e ita asegura sira hodi kontinua prosesu," Komandante DIKN Superintendente Reis dehan.
Tanba ne'e nia dehan, dadaun ne'e polísia sira asegura uluk vítima sira-nia vida tuir lei haruka depois halo prosesu investigasaun ba direitor kompaña, tanba hanesan autór ba rekrutamentu ilegál no halo asaun tráfiku umanu iha Timor-Leste.
"Tuir identifikasaun katak kompaña Keshavarz Great Timor Unipesial Lda, ne'ebé halo rekrutamentu ba sidadaun Pakistaunsira-ne'e rejistadu legalmente nia baze halo atividade servisu hanesan agrikultór no hakiak animal iha Hera-Díli," nia informa.
Nia dehan, kazu ne'e sei halo investigasaun ba parte vítima ho suspeitu sira hotu depois finaliza nia prosesu identifikasaun aprezenta relatóriu ba Ministériu Públiku (MP) mak iha kompeténsia atu halo prosesu tuir mai.
Enkuantu sidadaun Pakistaun na’in sanulu ne'e tama Timor-Leste iha tinan la hanesan balun iha 2023 no balun iha 2024.
Iha parte seluk Deputada Olinda Ximenes dehan, parte seguransa tenke identifika dokumentu husi kompaña ne'e rejsitu tuir prosedimentu legal sira ne’ebé eziste ka lae, tanba asaun ne’ebé mak sira halo ba traballadór sira-ne'e konsidera tráfiku umanu.
"Husu atu PNTL identifika mós sidadaun Pakistaun na’in-10 ne'e tama mai Timor-Leste sira utiliza vistu saida mak halo servisu hanesan Traballadór iha Timor-Leste, no ba oin autoridade iha fronteira tenke servisu ho sériu hodi kontrolu ema tama sai territóriu laran no utiliza vistu sira, ita lakohi kazu sira hanesan ne’e atu akontese iha iha nia nasaun," Deputada Ximens dehan.
Tanba ne'e nia dehan, tenke halo prosesu no foti medida rigorozu ba kompaña na’in tuir lei ne’ebé mak vigora iha Timor-Leste.