- Publika iha: 23 Setembro 2024
Uma-kain tolu-nulu-resin-haat (34), ne’ebé hela iha aldeia Kakeu-Laran suku Camea postu administrativu Cristo-Rei munisípiu Díli, durante tinan naruk nia laran la asesu ba bee moos hanesan ho uma-kain sira iha aldeia seluk.
Evangelino dos Santos nu’udar komunidade iha aldeia Kakeu-Laran hateten, iha tempu bailoron sira susar atu asesu ba bee moos, tanba sira ense bee tuir piket ne’ebé sira rasik halo.
“Iha ne’e ami iha preokupasaun liuba bee, tanba tempu bailoron ne’e bee araska, atu fase roupa ne’e ami ba kuru ne’e dok loos, ami la’o ba buka fali iha fat-fatin hanesan mota kuak sira-ne’e, iha ne’e iha bee matan mas ami ense tuir piketi ne’ebé iha,” Evangelino hateten.
Nia hatutan, iha uma-kain tolu-nulu-resin-haat mak iha fatin ne’ebá no ense bee loron ida uma-kain haat mak bele ense de’it bee moos ne’ebé iha.
“Iha ne’e iha uma-kain tolu-nulu-resin-haat mak ense bee ne’e, maibé tuir piketi, ense tuir loron, loron ida dala ruma uma-kain haat mak ense bee ne’e”, nia hato’o.
Iha fatin hanesan komunidade Jacinta Pereira deklara, sira halerik hela de’it ba bee moos no husu atu parte relevante atu tau matan ba sira, maibé laiha resposta.
“Ami halerik tanba bee, bainhira bee sai ne’e ami hadau malu, maibé estadu nunka tau matan ba ami, amine’epovu rai ida-ne’enian maibé nusa mak nunka tau matan mai ami kona-ba bee ida ne’e”, nia deklara.
Hatán ba preokupasaun komunidade nian Vise-Prezidente Komisaun Ezekutiva Bee Timor-Leste (BTL,EP), Gustavo da Cruz hateten, sira finaliza dezeñu ba zona sira kapital Díli no problema bee moos iha aldeia Kakeu-Laran tama ona iha governu nia planu.
“Kapitál Díli ne’e ita haree katak nia dezeñu detalladu ne’e ita finaliza hotu ona, tanba Díli ne’e iha Zona sanulu-resin-ida inklui Hera. Kondisaun ita-nia komunidade sira iha aldeia Kakeu-laran ne’e, ami hatene di’ak loos, sira hetan abastesimentu bee hosi mota Bena Mauk Bekora ulun no reforsa mós rezervatóriu ida iha Kulau ba komunidade sira iha ne’ebá.
Iha Kakeu-Laran parte kra’ik ne’e abastesi bee la’o, maibé ita-nia komunidade barak hela sa’e ba iha laletek ne’e mak bee laiha. Tan ne’e governu iha planu ne’ebé atu konstrui tanke boot ida iha rate Bekusi nia leten para bele hetan abastesimentu ba sira, tanba sistema iha okos, maibé komunidade iha leten hotu.