- Publika iha: 18 Junho 2024
Diretór Sentru Saúde Munisipál (SSM) Aileu, João de Jesus hateten, durante fulan lima (5) nia laran hahú husi fulan Janeru to’o Maiu, SSM rejistu kazu mortalidade oan hamutuk na'in ualu (8), tanba sofre moras asfiksia grave.
“Bebé sira-ne’e mate, tanba sofre moras asfiksia, ka dada iis araska, no moras sepsis infesaun. Asfiksia ne’e kauza husi inan nia kondisaun mós, liuliu inan sira ne'ebé sofre moras hipertensaun, moras infesaun, anemia, bele afeta bebé nia kondisaun, entaun sira moris mai hetan komplikasaun kauza ba mate,” nia hateten liuhusi via-telefone.
Nia dehan, husi na'in 8 ne’e mortalidade oan de'it, enkuantu mortalidade inan la iha, husi mortalidade oan sira-ne’e la'ós hotu-hotu mai mate iha sentru saúde, maibé balun mate kedas iha uma mak lori mai iha sentru saúde.
“Oan na'in 8 ne’ebé mate ne’e balun mate kedas iha sira-nia uma, antes to’o mai ami-nia fatin, maibé iha bebé na'in 8 ne’e mate ho kazu husi moras Asfiksia no balun mate kedas iha inan nia kabun laran, entaun mai to’o ami labele halo buat ida,” nia haktuir.
Diretór SSM husu ba Ministrériu Saúde atu apoia ekipamentu ne’ebé adekuadu iha fasilidade sira hotu no hasa'e koñesimentu pesoál saúde sira-nian liuliu kona-ba planu partu inklui kona-ba risku sira durante partu.
Iha parte seluk, Diretór Ezekutivu Formu ONG Timor-Leste (FONGTIL) Valentim da Costa Pinto hateten, governu tenki haree problema saúde ne’ebé agora grave no osan ne’ebé aprova ba saúde ho montante ki’ik, tanba sá la aumenta osan hodi hola ai-moruk.
“Governu presiza haree problema ida ne’e, kona-ba hola karreta bele hola maibé di'ak liu mak governu hola uluk ai-moruk hodi rezolve lai problema saúde ne’ebé agora daudaun enfrenta hela ba stock out ai-moruk. Karreta ne’e para tiha lai, tinan lima mai mak hola fali karreta, agora ne’e di'ak liu rezolve uluk lai problema sira-ne’e,” nia dehan.