- Publika iha: 20 Setembro 2024
Sua Santidade Papa Francisco husu joven sira Timor-Leste atu prevene aan husi alkohol no prepara idaidak nia aan hodi kria mehi ne'ebé boot, atu sai lideransa di’ak ba Timor-Leste iha futuru.
Nia dehan, alkohol bele estraga joven sira-nia amizade, tanba halo sira baku malu, oho malu, lakon sira-nia estudu, ikus mai Timor-Leste lakon nia jerasaun kontinuadór di’ak sira.
"Husu ba joven sira tenke prevene aan husi alkohol, imi tenke hatene kria mehi, no saida mak ita atu halo hodi realiza mehi sira. Ha’u husu imi tenke prepara imi-nia aan ho di’ak, tanba imi mak kontinua lidera Timor-Leste," Papa Francisco dehan iha momentu sorumutuk ho joven sira iha Centro Convenções de Díli (CCD).
Nia dehan, se joven ida mak la hatene kria nia mehi, sai hanesan ema ne’ebé reforma ona husi moris, nomós tenke halo barullu hodi hatudu katak vida moris mak ne'e.
"Halo barullu ida ne'ebé mak kontribui ba imi-nia futuru ne’ebé mak di’ak, la’ós barullu ho alkohol, baku malu no tuda malu," nia salienta.
Nia hatene, joven sira tenke iha rekonsiliasaun, atu nune'e bainhira iha konflitu ruma ikus sira tenke rekonsilia atu nune’e labele sai inimigu ba maluk sira.
Alende ne'e Papa Francisco husu ba, joven sira tenke respeita no hadomi labarik ki'ik no ferik katuas sira, tanba sira mak rikusoin ne'ebé furak liu iha sosiedade.
Iha fatin hanesan Joventude Katólika Munisípiu Ermera Yolanda Pereira Alves dehan, mensajen sira ne’ebé Papa Francisco rai hela ba joventude Timor-Leste, ne'e signifika tebes, tanba ne'e tenke esforsu aan hodi moris tuir mensajen ne'e hameno husi Sua Santidade.
"Mensajen hirak ne'e reflete ba realidade moris juventude Timor-Leste nian, liga ho akontesementu sira ne’ebé akontese, hanesan joven sira hemu lanu pois tuda malu, baku malu to'o lakon vida no haluhan prepara futuru ne’ebé di’ak hodi dezenvolve nasaun ida-ne’e iha futuru," nia hatete.
Nia dehan, nu’udar joven esperansa ba vizita Santo Padre Papa Francisco mai iha Timor-Leste ne'e, ho nia mensajen furak sira bele loken joven sira-nia hanoin no hadook an husi hahalok kriminozu sira hodi konsentra ba estudu hodi prepara aan sai joven kontinuadór no lideransa di’ak iha futuru.
Entretantu Reprezentante Joventude katólika Munisípiu Manatuto Anastasia da Costa, nia esperansa ba vizita Sua Santidade nian iha Timor-Leste bele hametin paz ba joven sira, hodi bele sai joven ne'ebé maduru no konstrutivu no prepara aan di’ak liutan.
"Ha’u husu ba maluk joven sira hotu mai ita banati tuir mensajen ne'ebé Santo Padre Francisco rai hela hodi bele dezenvolve ita-nia nasaun iha futuru," nia dehan.
Alende ne'e nia dehan, kontente tebes tanba iha vizita Sua Santidade Papa Francisco ne'e marka tan istória boot ba Timor-Leste ho nune’e bele haree direita Sua Santidade Papa Francisco.