- Publika iha: 13 Agosto 2024
Diretór Departamento de Comunicação Social (DCS), Roberto da Costa Pacheco, hateten departamento liuhusi asosiasaun estudante departamentu (AED) nian koolabora hamutuk ho departamentu halo servisu sosiál iha tinan 2024ba dala haat ona iha munisípiu Ainaro.
“Dedikasaun komunidade parte importante husi universidade, tanba ita iha ensinu superior ita la bele estuda de’it tanba ita lahatene saida maka akontese iha terenu, hanesan departamentu komunikasaun sosiál hanesan departamentu ne’ebé eduka estudante sira aban bairua sai matan, tilun, ibun ba iha sosiedade nian. Tanba ne’e maka departamentu liuhusi asosiasaun estudante nian ho inisiativa rasik halo atividade servisu sosiál ne’e hamutuk ho komunidade,” dehan Diretor Pacheco.
Diretór hatutan, iha universidade iha pilar tolu ne’ebé tenki priense maka hanesan ensinu maka kada semester sempre hala’o ona, iha mós peskiza maka baibain dosente sira fó traballu ba estudante ba halo peskiza no mai aprezenta rezultadu peskiza, no ikus maka dedika-aan ba komunidade ou servisu sosiál maka estudante ho departamentu hala’o ona.
“Servisu sosiál ne’ebé durante ne’e estudante hamutuk ho dosente, inklui alumni hala’o ona maka dahuluk hala’o servisu komunitaria hamutuk ho komunidade suku Leorema Munisípiu Liquiçá hodi ajuda halo kontrusaun rezidénsia amu nian durante loron tolu iha tinan 2020, daruak servisu sosiál hamutuk ho komunidade Hatubuilico munisípiu Ainaro atividade kontrusaun igreja Parokia Hatubuilico durante loron tolu tinan 2022.
Atividade datoluk servisu sosiál hamutuk sarani sira iha suku Dato Munisípiu liquisa atividade hada morru igreja nian durante loron tolu tinan 2023, tinan ida realiza fali hamutuk komunidade suku Aituto atividade hanesan apoiu ba kontrusaun igreja ne’ebé konstrui rasik husi komunidade durante loron tolu,” dehan Diretór.
Iha sorin seluk dosente responsável servisu sosiál iha DCS, Miguel Gonçalves, hateten atividade implementa iha suku Aituto, Postu Administrativu Maubisse, munisípiu Ainaro estudante, dosente ho alumni sira lalin fatuk no hada aliserse kapela nian kuartu rua.
“Atividade ne’ebé hala’o ita tau osan hamutuk husi estudante, dosente, no apoiu mós husi alumni sira hodi apoiu sumente saka sanulu resin lima (15) ba katekista no autoridade suku Aitutu nian hodi uza ba konstrusaun kapela Kapela Ave-Maria Aituto nian.
Ita lalin mós fatuk husi mota ba tau hamutuk iha kapela, nune’e fatuk ne’ebé tau hamuuk ona bele uza kee no hada aliserse kuarta rua husi parte kapela nian ne’ebé autoridade sira entrega ba ita. Ita hamutuk ho komunidade hala’o limpeza iha resintu kapela nian no resintu suku nian. Aleinde ne’e, estudante sira mós halo sosializasaun perfíl DCS nian ba estudante Ensinu Sekundária Jerál nia Klase Paralelu Aituto nian”, nia dehan.
Nia dehan, atividade ne’ebé hala’o ho apoiu husi estudante, dosente, alumni DCS nian no kolabora ho autoridade lokál suku nian, Amu Paroku Maubisse nian inklui katekista sira husi Kapela Ave-Maria Aituto nian.
Aleinde ne’e, Xefe suku Aituto, Grigorio Lopes Pereira agradese ba DCS, tanba bele hili Aituto hanesan lokál ba atividade oioin ne’ebé bele ajuda komunidade no sarani sira iha Aituto.
“Lori komunidade Aituto agrdese ba DCS liuliu estudante, dosente, alumni sira tanba bele mai iha Aituto ne’e ho atividade oioin ne’ebé bele ajuda komunidade, ne’e hatudu ona estudante sira mak sai ajente transformadór ba dezenvolvimentu,” dehan finalista husi Departamento de Desenvolvimento Comunitário-FCS.