Costa Harii Grupu Arte Kreativu Hodi Fahe Esperiénsia Ba Joven Sira

Luis Saldanho Pereira da Costa hanesan joven kreativu ho tinan 25, husi munisipiu Oe-Cussi, postu administrativu Pantai Makasar, suku Taiboko ho inisiativu harii grupu Arte Kriativu hodi fahe esperiénsia arte nian ba joven sira.

Nia dehan, atividade ne’ebé grupu Arte Kriativu ne’e hala’o mak hanesan toka Viola, Pintura, Tesi Letra, Múzika, Poezia no Dansa Kulturál ba maluk joven sira ne’ebé iha vontade hodi fó tempu aprende.

“Grupu Arte Kriativu ne’e atu halibur maluk joven sira ne’ebé iha talentu oinoin, maibé la hetan oportunidade, tanba ne’e ha’u hakarak akumula maluk joven ne’e hotu hodi promove sira-nia talentu.

Grupu Arte Kreativu ne’e hanesan naran komun ida ne’ebé kompostu husi arte sira maka hanesan toka Viola, Pintura, Tesi Letra, Múzika, Poesia, Dansa Kultura no seluk-seluk tan,” dehan Xefe Grupu Arte Kreativu ne’e.

Nia haktuir, Grupu Arte Kriativu harii iha loron 11 fulan Novembru 2023, no iha membru ativu na’in ruanulu resin lima (25) no akumula ona joven ho talentu oioin.

“Joven ne’ebé partisipa iha grupu ne’e ho talentu oioin no sira ne’ebé ativu hamutuk 25, no sira-ne’e mak partilla fali esperiénsia ba joven sira ne’ebé hakarak envolve iha atividade sira, maibé partisipante sira mai tuir tempu ne’ebé sira iha, tanba sira-ne’e mai husi estudante, tanba ne’e sira sempre fahe tempu ba atividade hotu,” Nia dehan.

Nia mós husu ba maluk sira ne’ebé sei iha talentu oin-oin, maibé seidauk hatudu aan bele hakbesik ba aprende hamutuk no aplika talentu sira-ne’e hamutuk.

Iha fatin hanesan Isabel Mendonça Andrade nu’udar joven ne’ebé envolve iha Grupu Arte Kreativu hateten, nu’udar joven ida, nia sente orgullu bele partisipa iha grupu Arte Kreativu ne’e.

“Ha’u hanesan formanda primeira iha grupu Arte Kreativu hahú kedas husi grupu ne’e fofoun harii to’o ohin loron ha’u bele hetan oportunidade hodi sai hanesan formadora hodi partilla esperiénsia ne’ebé iha ba maluk joven sira seluk no ba ha’u sente orgullu loos bele tama iha grupu Arte Kreativu,” Dehan nia.

Nia hatutan, durante nia tama iha grupu Arte Kreativu nia hetan esperiensia lubuk hodi sai hanesan mata dalan ba nia.

“Ha’u durante inklina aan iha grupu Arte Kreativu sempre hetan esperiensia lubuk tebes no nu’udar joven ida sente hanesan buat foun ne’ebé presiza atu hatutan nafatin hodi sai hanesan bukae ba ha’u nia aan no ba futuru,” Tenik nia.