Terça, Maio 21, 2024
Total visitors: 766366

Eis jornalista no editor Sunday Herald Sun, iha Melbourne, Australia, Paulie Stewart hateten sente kontente buka fundu no material apoia kongregasaun Irmán Alma tau matan ba labarik sira ho defisiénsia oioin, liu-liu asistensia terapia no formasaun edukasaun ba labarik sira.

Eis jornalista no editor Sunday Herald Sun, iha Melbourne, Australia, Paulie Stewart hateten sente kontente buka fundu no material apoia kongregasaun Irmán Alma tau matan ba labarik sira ho defisiénsia oioin.

Nia dehan iha tinan 2022, lansa nia livru ida ho títulu Paulie Stewart All the Rage iha Melbourne, Australia. No iha loron 28 fulan setembru tinan 2023, lansa livru ne’e iha Díli, Timor-Leste ho objetivu faan no orsamentu ne’e ajuda fali sentru rekursu ba labarik defisiénsia Irmán Alma tau matan ba labarik sira.

“Ha’u hanoin di’ak tebes Timoroan sira bele sosa livru ne’e, tanba osan sira-ne’e sei ajuda fali Irmán Alma sira ne’ebé tau matan ba labarik sira ho defisiénsia.

Bainhira ha’u foufoun mai iha ne’e tinan 15 liuba, Madre na’in lima sira iha motorizada ida de’it ho labarik defisiénsia na’in 10. Sira laiha buat ida laiha osan, entaun ha’u hanoin tenke halo buat ruma ajuda sira no ami halo fundraising iha Australia inklui lori madre sira ba Australia vizita eskola sira ko’alia kona-ba servisu ne’ebé sira halo no agora ema barak fó apoia sira,” nia hateten hafoin lansa livru iha sentru rekursu ba labarik defisiénsia Irmán Alma iha Praia dos Qoqeiros, Díli.

Nia hateten livru ne’e kona-ba nia istória moris, hahú husi bainhira nia maun Tony Stewart, jornalista ne’ebé militar Indonesia oho hamutuk jornalista na’in haat seluk iha postu administrativu Balibo, munisípiu Bobonaro, iha tinan 48 liuba.

Nia hatutan ho trajedia Balibo Five tinan 48 liuba, nia koñese Timor-Leste no envolve iha movimentu solidaridade husi Australia, promove independénsia Timor-Leste nian. No hamutuk ho Timoroan sira balun harii banda múzika ida ho naran Painters and Dockers hodi hala’o misaun advokasia liuhusi mázika.

Nia haktuir livru ne’e mós ko’alia nia kondisaun saúde, liu-liu moras liver ka infesaun aten bo’ot ne’ebé nia sofre no sofrementu, sakrifisiu ne’ebé halo to’o hetan transplantasaun aten bo’ot foun husi doador voluntáriu. Alende ne’e, ko’alia mós oinsa hasoru malu ho madre sira iha konregasaun irmán Alma iha Timor-Leste no servisu hamutuk to’o agora.

“Ha’u agradese tebes hasoru madre sira, ha’u la’ós ema relijiaun katólika bo’ot ida. Maibé irmán sira-ne’e naok ha’u nia fiar ba Jesus tanba sira real,” nia agradese.

Iha parte seluk, Madre Konregasaun Irmán Alma, Anastasia Muti hateten, agradese no apresia tebes ba eis jornalista no kantor, Paulie Stewart ne’ebé ajuda ona sira iha tinan barak nia laran, intermus material no fundu.

“Iha tinan 2009, nia hahu ajuda ami to’o agora. Apoia ne’ebé fó ba ami mak material hanesan roupa no buat brikeidus ba labarik sira halimar no orsamentu,” hatete Madre Muti.

Nia informa agora dadaun labarik ho defisiénsia nain 19 mak hela hamutuk ho madre sira iha konregasaun Irmán Alma. No labarik sira-ne’e husi munisípiu Viqueque, Baucau, Ermera, Aileu.

Nai hatutan asistensia ne’ebé sira fornese ba labarik sira-ne’e bazeia ba nesesidade labarik sira ida-ida nian, tanba labarik sira-ne’e ho defisiénsia oioin. Entaun sira ne’ebé ho defisiénsia matan aprende braile, defisiénsia tilun aprende lian jestual, sira ne’ebé ho cerebral palsy halo fisioterapi no sira ne’ebé retardasi mental ne’e sira labele tama eskola normal, entaun hanorin sira to’o bele.

Nia informa sira mós hetan apoia fundu kada tinan husi governu, liuhusi Minsitériu Solidaridade Sosial no Inkluzaun (MSSI).