Komandu PNTL Husu OPS Kria Paz Iha Sosiedade

Komandu Polísia Nasionál Timor-Leste PNTL husu Ofisial Polísia Suku (OPS) servisu besik ba iha autoridade lokal no komunidade atu bele halo prevensaun ba konflitu hodi kria paz iha sosiedade.

Komandante Jerál PNTL Komisáriu Henrique da Costa dehan, Ofisiál Polísia Suku (OPS) ne'ebé destakadu iha suku hotu iha territóriu laran tenke halo servisu ho profisionalismu ho objetivu ida katak, lori polísia besik liuba komunidade.

"Ita husu ba membru Ofisiál Polísia Suku sira atu servisu ho profisionalismu tuir orden komandu nian hodi kria paz iha sosiedade," nia hatete.

Tanba ne'e nia dehan, OPS sira mak hanesan liman ain husi komandu PNTL nian hodi halo servisu direitamente ho komunidade iha área rurál no fatin izoladu sira, tanba ne'e tenke halo misaun tuir orden irarkia komandu nian.

"Maibé ita haree tinan barak nia laran OPS sira halo servisu iha baze hamutuk ho komunidade sira, maské hasoru difikuldade barak hanesan, pesoál OPS ida servisu iha área jurídiku ne’ebé mak luan tebes no la iha transporte hodi fasilita sira-nia servisu ho lalais," Komisáriu Jerál PNTL Costa dehan.

Tanba ne'e nia dehan, komandu halo ona proposta ba governu liu-liu Ministériu Interior atu tau importansia ba asuntu OPS nian.

Enkuantu total Ofisiál Polísia Suku (OPS) iha territóriu laran hamutuk na’in-412, kompostu husi MunisípiuAileu iha OPS nain 33, Ainaru 21, Baucau 59, RAEOA 18, Vikeke 36, Manatutu 30, Ermera52, Likisa33,Manufahi8, Bobonaru 56, Lautém 3, Díli 27 no Atauro 5.

Entretantu, Admistradora Postu Soibada, Terezinha da Costa Moniz dehan, dadaun ne'e postu Soibada iha Ofisiál Polísia Suku OPS na’in-2 mak halo servisu besik liuba komunidade iha Suku lima iha Soibada kompostu husi Suku Manlala, Leo-Haat, Uma-kerek, Fatu-Makerek no Suku Maun-fahe.

"Itaharee durante ne'e OPS liu-liu iha Postu Soibada ne'e servisu di’ak tebes no sempre fó seguransa besik ba komunidade iha situasaun saida de’it, atu udan ka loron manas kalan ka loron, dala ruma sira la’o ain de’it," nia hatete.

Tanba ne'e nia rekoñese, servisu Ofisiál Polísia Suku nian durante ne'e susesu tebes liu-liu iha Soibada ba prevensaun konflitu nian.