- Publika iha: 21 Setembro 2024
Vise-Dekanu Asuntu Administrasaun Finansas Faculdade de Ciências Sociais Ubaldo Guterres hateten, haree husi perspetiva akadémika inan-aman iha direitu atu eduka no responsabilidade ba oan sira hodi labele la’o tuir dalan ne’ebé sala.
“Inan-aman nia diretu maka tenki iha responsabilidade atu eduka no husu tuir sira banhira ba fatin ruma, hodi nune’e bele hatene oan ne’e ba ne’ebé, tanba labarik balu iha idade kiik no balu joven, maibé presiza tau atensaun ba sira-nia atividade.
Oan sira ho idade joven ne’e maka presiza atensaun, ho ida-ne’e inan-aman mós tenki halo regulamentu ruma hodi regula oan sira ne’e, atu labele oan sira la’o tuir vontade katak, la’o kalan la hatene no la’o loron mós lahatene ne’e la di’ak,”dehan nia iha Kampus Kaikoli, Díli.
Nia hatutan, papél inan-aman nian maka tenki akompaña oan sira hodi sira labele monu ba tentasaun sira.
“Oan sira ransu hodi aprende buat sira ne’ebé fó impaktu ka buat sira ne’ebé negatiue ba sira nia an ho ida-ne’e inan-aman nia papél maka tenki akompaña hela de’it sira-nia lalaok ka atividade durante loron tomak hahu husi dader to’o tuku 8:00 kalan, ida-ne’e maka importante,”Tenik nia.
Nia dehan, banhira eduka labarik sira presiza hare emós husi inan-aman sira-nia responsabilidade atu bele eduka oan sira.
“Ita eduka labarik sira-ne’e tenki haree mós koñesimentu no responsabilidade inan-aman sira-nian, tanba ida-ne’e maka liu husi ministériu relevante, oinsá maka bele kria edukasaun sívika ida hodi disemina papél loloos inan-aman nian ne’e oinsa, la’ós hetan tiha oan husik de’it, maibé tenki iha responsabilidade to’o oan ne’ehe tan susesu iha nia moris,” dehan nia.
Iha sorin seluk Francisca Cardosos nu’udar inan ba oan na’in ida (1) husi Suku Lahane Oriental hateten, nu’udar inan iha papél ba oan sira maka hanesan mós profesór/a hodi eduka oan sira hahú husi uma-laran antes sira sai ba li’ur.
“Nu’udar inan ida iha papél maka hanesan manorin-na’in ida,hodi eduka sira kona-ba oin sauza étika no aprende atu labele monu ba era teknolojia iha mundu modernu ida-ne’e, tanba mundu modernu labarik barak maka la’o sala ka sempre utiliza oportunidade sira hodi haluhan aan no la’o sala, tanba ne’e tenke eduka sira no inan iha hodi hanorin oan sira atu lao tuir dalan loos ba futruru,” Dehan nia.
Nia hatutan, inan nia papél importante maka hanorin oan sira hahu husi idade kiik hodi aprende kona-ba edukasaun ida ne’ebé di’ak ba sira-nia moris liuliu ba futuru.
“Inan nia papél importante maka tenki eduka oan sira hahu kedas husi kiik no eduka sira atu ba eskola hodi nune’e bele sai oan ne’ebé di’ak no matenek iha sira-nia estudu até susesu iha sira-nia mehi, sira-ne’e inan aman tenki esforsu halo,” Tenik nia.
Nia informa, ba inan sira tenki esforsu makaas hodi fó edukasaun ne’ebé di’ak ba oan sira no inan aman labele obriga oan sira atu halo servisu.
“Nu’udar inan ida tenki esforsu makaas hodi eduka oan sira tenki hetan edukasaun ne’ebé kualidade no inan-aman labele obriga oan sira halo servisu, tanba ita-nia oan tenki haruka ba eskola no halo saida deit maka tuir labarik kiik nian hodi halo sira kontenti no nafatin aprende ka asesu edukasaun ne’ebé ho fleksivel,” Informa nia.