- Publika iha: 13 Setembro 2024
Estudante ativu Universidade Nasional Timor Lorosa’e (UNTL) ne’ebé rejistu ba semestre impár tinan 2024 nian ho totál estudante hamutuk 24.449 no husi númeru ne’e estudante feto hamutuk 14.739 ho pursentu (60,3%), enkuantu estudante mane hamutuk 9710 ho pursentu (39,7%).
Diretór Diresaun Nasionál Atendimentu Estudante (DNAE) Rui Loco Pires informa, dadus jeral universidade nian tuir lista estudante hamutuk 49.914, maibé barak mak la ativu ona.
“Ita-nia totál estudante ne’ebé maka iha lista universidade nian hamutuk 49.914, maibé sira ne’ebé ativu ne’e maka 24.449 mak rejistu iha ne’e no ativu hela iha universidade no la mai ne’e maka besik rihun 25.465 mak la mai rejistu.
Totál husi estudante ativu 24.449 distribui ba kuantidade tuir jéneru ho feto 14.739 ho pursentu (60,3%) no estudante mane ativu hamutuk 9710 ho pursentu (39,7%),” Rui Loco informa iha nia knaar fatin, Kampus Sentrál, Díli.
Nia hateten, haree ba jéneru, la’ós mane de’it mak iha direitu hodi asesu ba edukasaun no númeru estudante feto aas liu, tanba sira badinas atu aprende.
“Ita haree ba jéneru feto mós iha direitu atu eskola la’ós mane de’it, ne’ebé ba ha’u-nia haree feto sira-ne’e hakarak duni atu eskola, mane sira ladún iha interese, iha dadus ne’ebé ita iha ne’e, feto mak ativu mane ladún ativu, tanba ne’e maka feto nia númeru sa’e aas iha ita-nia universidade,” nia hateten.
Iha fatin hanesan, Senadu Estudante Faculdade de Direito Cesar João M. Baptista hateten, iha konteksu edukasaun la haree ba jéneru, maibé depende ba sira ne’ebé mak hakarak aproveita oportunidade ne’ebé iha.
“Kona-ba persentajen feto ativu barak liu kompara ho mane, ida-ne’e di’ak, tanba iha kontekstu edukasaun ita la haree ba mane ka feto depende sé maka aproveita, sé feto sira konsege liu ne’e ha’u hanoin katak ne’e oportunidade di’ak, tanba sira bele aproveita okaziaun, ida ne’ebé bele enkoraja mós mane sira para ativu liután iha prosesu ensinu sira ne’ebé hala’o iha universidade,” nia hato’o.
Estudante Angelita de Orleans Pacheco salienta, nia orgullu ho pursentu estudante feto nian ne’ebé hatudu aas liu duké pursentu estudante mane sira.
“Ha’u nu’udar estudante ne’ebé aprende hela iha UNTL, ha’u kontenti tanba kuantidade estudante feto nian bele aas liu mane, ida-ne’e hatudu katak agora tempu mai ita feto sira atu labele lakon ho mane sira, ita tenki buka oportunidade atu bele avansa nafatin hodi hetan esperénsia atu bele kontribu iba ita-nia aan no bansaun,” nia hakotu.