Quinta, Julho 18, 2024

Ministériu Interior (MI) husu Tribunal atu kopera ho Polísia Nasional Timor-Leste (PNTL) liuhusi departamentu investigasaun hodi bele foti desizaun ba autór kazu krime sira inklui ba kazu furtu sira.

Ministériu Interior (MI) husu Tribunal atu kopera ho Polísia Nasional Timor-Leste (PNTL) liuhusi departamentu investigasaun hodi bele foti desizaun ba autór kazu krime sira inklui ba kazu furtu sira.

Nia dehan, liga ba kazu furtu agravadu ka kazu na’ok sira ne’ebé mak tribunal ho Ministériu Públiku sempre liberta autór sira no ikus mai autór hirak ne'e sempre repete aktu na’ok.

"Husu ba Tribunal no Ministériu Públiku no bainhira foti desizaun ikus ba autór ba kazu na’ok sira tenke kopera ho parte PNTL liu-liu departamentu investigasaun, nune'e bele foti desizaun ne’ebé mak merese duni ba autór sira," nia dehan.

Nia dehan, durante kazu na’ok ne’ebé akontese, polísia halo esforsu makas buka tuir no kaptura autór hirak ne'e, polísia sempre kaer no submete ba tribunal depois tribunal mak liberta fila fali.

"Ita-nia Polísia sira servisu maka'as hodi buka tuir autór sira depois lori ba ministeriu publiku ikus tribunal liberta no publiku nafatin fó sala no kestiona kapasidade polísia nian. Atu evita kazu na’ok ne'e tenke involve polísia bainhira foti desizaun ikus," MI Guterres salienta.

Iha parte seluk, Komandante Investigasaun Criminál Nasionál, PNTL, Inspetór Xefe João Correia dehan joventude hirak ne’ebé mak polísia kaptura, tanba halo atividade na’ok iha kapital Díli ne'e balun kaer prosesu dala rua ka tolun ba leten ona.

"Autór hirak ne'e ita sempre buka tuir kaer lori mai submete ba sela 72 oras hodi halo investigasaun, hotu ita entrega ba Ministériu Públiku no Tribunal hodi kontinua prosesu, tanba sira mak na’in ba prosesu," nia hateten.

Nia dehan, bainhira submete ona ba Ministériu Públiku hodi kontinua prosesu ba Tribunal hodi foti desizaun ba autór hirak ne'e polísia la inklina, tanba prosesu husi parte polísia remata ona, maibé atu hetan desizaun loloos ba autór na’ok sira, tenke envolve mós polísia nune'e autór ba kazu na’ok sira labele liberta nafatin.