- Publika iha: 13 Setembro 2024
UNESCO (United Nations Educational, Scientific and Cultural Orgaization) apoiu Sekretáriu Estadu Arte no Kultura (SEAK) identifika eransa estadu nian hanesan sitiu arkeolójika Tutuala, Foho Ramela, Jaco no Uma-Lisan hodi ba rejistu iha UNESCO Paris, nune’e bele hili ida sai eransa mundiál nian.
Sekretáriu Estadu Arte no Kultura (SEAK) Jorse Soares Cristovão dehan, tuir konvensaun UNESCO ne’ebé ratifika iha 2003 ne'e importante ba Timor-Leste oinsa bele identifika eransane’ebé sai lista tentativa hodi rejistu iha UNESCO.
"UNESCO apoiu SEAK no forma ekipa ida hodi halo identifikasaun ba eransa estadu nian hirak ne'e, hodi lori ba rejistu iha UNESCO Paris no sei hili ida sai eransa mundiál liuliu Timor-Leste nian," nia hatete.
Tanba nia dehan, sitiu sira ne’ebé tama iha lista idenfikasaun ne'e mak Tutuala, Jaco, Foho Ramelau, no Uma-Lisan, sira-ne'e mak eransa avo sira husik hela.
"Iha fulan Jullu ita sei lori lista tentativa hirak ne'e ba aprezenta iha UNESCO París no komisaun mak sei deside sitiu ida ne’ebé mak merese atu rekoñese rai eransa mundiál," SEAK Cristovão dehan.
Nia dehan, Sekretáriu Estadu Arte no Kultura sei la servisu mesak, maibé servisu entre liña ministeriál sira.
Entretantu Sekretáriu Ezekutivu UNESCO Timor-Leste Luis Neves dehan, Timor-Leste ratifika ona konvensaun tolu, konvensaun 2003 kona-ba patrimóniu kulturál no material ne'e mak rejistu ona tais ba UNESCO hetan ona rekoñesimentu ona.
"Konvensaun 2016 nian kona-ba diversidade espresaun kultura no natural ratifika tinan 8 ona, maibé Timor-Leste seidauk halo, ohin ita halo sorumutuk UNESCO ho governu kona-ba oinsa halo lista no nomeia fatin ruma sitiu ruma no arkeolójika ruma atu bele aprova sai patrimóniu mundiál," nia informa.
Tanba ne'e nia dehan, husi UNESCO nafatin apoiu governu atu bele identifika eransa hirak ne'e to'o lori ba aprezenta iha UNESCO París.