- Publika iha: 21 Setembro 2024
Xefe Joventude suku Batara, Postu Administrativu Laclubar, Munisípiu Manatuto Elizaria de Fatima Bernardete hateten, haree ba realidade ohin loron labarik ho idade 7-15 balun maka sei abandona estudu hodi buka rasik osan, maibé loloos tenki tau importánsia ba eskola.
"Ha’u hanesan mós autoridade lokál iha suku Batara ho pozisaun Xefe Joventude atu haree kona-ba joven sira iha suku ida-ne'e liga ba ohin loron iha ha’u-nia observasaun dalabarak labarik ho idade 7-15 balu husik sira-nia estudu hodi buka rasik osan.
Husi sira-ne’e sai problema, tanba sira loloos idade ida ne’ebé sei tau prioridade liuba iha eskola, tanba sira maka sei sai joven ba jerasaun foun ba dezenvolvimentu Timor-Leste nian,"dehan nia.
Nia hatutan, abandona sira-nia estudu hodi halimar no buka osan ne'e, bele impede sira-nia mehi ba futuru no loloos inan-aman maka esforsu hodi haree ba ida-ne'e.
"Problema ne'ebé sira hasoru maka liuhusi sira abandona eskola sira sei hamate mehi ne’ebé sira iha, no iha parte balu sira abadona eskola, tanba ekonomia família, maibé loloos ne’e ekonimia família inan-aman maka tenki esforsu hodi haree ba ida-nee no labarik sira tenki eskola nafatin hodi sente katak sira mós sai ema ne’ebé importante atu livre hodi hanoin no kontribuisaun dezenvolvimentu nain," tenik nia.
Nia informa, nu'udar Xefe Joventude sei esforsu ho estrutura suku sira hodi haree ba problema sira-ne'e, atu hatoo ba parte relevante hodi bele responde ba problema ida-ne'e, tanba labarik sira maka jerasaun foun ba nasaun.
"Nu’udar Xefe Joventude sei esforsu makaas ho estrutura suku sira hodi haree ba problema ida-ne'e atu bele hato’o ba parte relevante hodi tau matan ba labarik sira ne'ebé abandona eskola, tanba ekonomia família nomós balu ne’ebé lakohi eskola hodi buka rasik osan, tanba sira-nia idade ne’ebé presiza eskola hodi hanoin ba dezenvolvimentu nasaun nian no família,"Nia informa.
Entretantu Akadémiku husi UNTL, Valente Gusmão Laranjeira dehan, nia preokupa tebes ba labarik sira ne'ebé faan sasán iha dalan ninin ne'e sai hanesan problema boot ida, tanba loloos inan-aman sira tenki eduka oan ho dalan ne'ebé di’ak.
"Labarik sira ne'ebé fa’an sasán iha dalan ninin ne'e problema sosial ida ne'ebé mais krusiál liu, tanba ne'e inan-aman sira tenki iha responsabilidade morál atu inspira no motiva nia oan sira atu la’o tuir dalan ne'ebé di’ak. Tanba ohin loron ita tama ona ba era modernu no haree mós ba ema nia nasaun sempre tau prioridade di’ak liuba partisipasaun labarik sira-nia iha estudu hahú husi estudu infantíl mai to'o eskola sekundária," dehan nia.
Nia hatutan, hanesan mós aman ida nia sente triste haree labarik sira ne'ebé faan sasán iha dalan ninin, tanba idade ne'ebé kiik, la’ós atu buka osan, maibé sira tenki tau importánsia ba eskola.
"Nu'udar aman ida mós, ha'u sentimentu ida liga ba labarik sira ne'e triste tanba lolos ho idade labarik labele atu buka osan, prontu ita nu'udar inan-aman atu hanorin sira moris mandiri ka independen maibé laos iha tempu ida hanesan ne'e, inan-aman maka sai ezemplar ba oan sira kuidadu sira iha momentu ne'ebé idade labarik no hanorin sira to'o idade adultu no mos bele halo servisu hanesan inan aman hatudu,” Tenik nia.
Nia rekomenda, husu ba inan-aman sira hodi tau importánsia ba labarik sira hodi hetan diretu ne'ebé seguru, tanba ne’e tenki tau prioridade ba sira-nia diretu hodi estudu la’ós servisu.