- Publika iha: 23 Setembro 2024
Parlamentu Nasionál husu Ministériu Edukasaun (ME) rezolve problema Profesór kontratadu ne’ebé mak ME hapara sira-nian kontratu tuir rezolusaun numeru 38/ VI (a1) 2023 ne'ebé mak aprova ona hodi labele fó impaktu ba ensinu aprendisajen.
Deputada Maria Angelina Lopes Sarmento dehan, durante ne'e profesós kontratadu sira ativa hela hanorin iha eskola, maibé ME la rezolve sira-nia problema, nafatin halo rekrutamentu foun ba profesór permanente.
Nia dehan, profesór sira ne’ebé mak dadaun ne'e halo manifestasaun iha Ministériu Edukasaun ne'e abandona hela estudante sira hodi mai ezije sira-nia direitu, tanba balun hanorin kuaze tinan 13 ona, maibé ministériu la rekruta ba permanente.
"Ministériu Edukasaun tenke rezolve problema profesór kontratadu no reklamante hirak ne'e tuir resolusaun númeru 38/VI (a1), atu nune’e labele fó impaktu ba ensinu aprendisajen," nia dehan liga ho manifestasaun ne’ebé profesór kontratadu tinan 2023 halo hasoru Ministériu Edukasaun iha Edifísiu VilaVerde, Díli.
Nia dehan, profesór hirak ne’e balun kada loron iha materia full iha aula, balun lori materia, lian Tetum, Matemátika, Historia, no matéria espesifiku sira husi Ensinu Tékniku Vokasionál (ESTV) nian.
"Ita-nia profesór hirak ne'e Ministériu Edukasaun hapara sira-nia kontratu iha tinan 2023 no sira nafatin kontribui hodi hein rekrutamentu, maibé to'o ohin loron la iha kontratu no ministériu halo rekrutamentu fali ba profesór foun seluk," niain forma.
Nia dehan, tuir loloos ne’e problema profesór kontratadu no reklamante hirak ne'e rezolve ona tuir rezolusaun númeru 38/VI (a1) ne’ebé aprova tiha liu loron 30-60 ne'e tenke rezolve ona, maibé ministériu la rezolve no profesór sira deside hodi halo manifestasaun.
Entretantu Diretór Ezekutivu Sekundariu Jeral 4 de Setembru UNAMET Díli Alexandre da Costa Belo dehan, profesór sira ne’ebé mak Ministériu Edukasaun hapara sira-nia kontratu ne'e difikulta tebes ba elaborasaun matéria ezame segundu períodu nian.
"Ita husu Ministériu Edukasaun atu buka meiu oinsá hodi bele rezolve problema profesór kontratadu sira ne’ebé mak hapara, atu nune’e estudante sira labele sai vítima no kontribui ba impaktu dezenvolvimentu edukasaun," nia dehan.
Nia dehan, dadaun ne'e iha eskola refere menus profesór hamutuk 16 hodi kompleta ba matéria sira, tanba ne'e presiza aumenta tan profesór hamutuk 16 hodi bele normaliza fali esnisu aprendisajen hanesan baibain.