- Publika iha: 03 Setembro 2024
Servisu Saúde Munisípiu (SSM) Díli ho Prezidenti Autoridade Munisípiu (PAM) Díli servisu hamutuk hodi bele atende ba asuntu saúde iha Díli hodi simu vizita amu Papa nian iha Timor-Leste iha fulan setembru 2024 nia laran.
Diretór SSM-Díli, Mateus Pinto, hateten sira agora preparadu hodi simu vizita Amu Papa nian, tanba saúde munisípiu Díli servisu hamutuk ho Prezidenti Autoridade MunisípiuDíli nian, kria ona ekipa ida ne'ebé preparadu atu halo atendimentu saúde ba partisipante sira durante vizita Papa nian iha Timor-Leste.
“Saúde Munisípiu Díli ita sei haree liuba komunidade sira iha Munisípiu Díli nian, tanba ne’e ha’u hanoin ita preparadu para oinsa mak ita bele halo buat ruma, tanba ida-ne’e eventu ne’ebé importante,” nia dehan.
Iha parte seluk, Prezidenti Autoridade Munisípiu (PAM) Díli, Gregório da Cunha Saldanha hateten, autoridade Munisípiu Díli, harii ona ekipa lokál ida, hodi haree ba vizita Amu Papa nian, tanba ne’e hanesan autoridade Munisípiu Díli tenki preparadu ba eventu refere.
“Ami simu ona despasu ida husi governu atu oinsa bele halo servisu no prepara kompozisaun estruturál, tuir saida mak hakerek ona iha despasu ne’e depois ita koopera atu servisu ne’e la’o di’ak liu. Munisípiu Díli iha ekipa ida hodi prapara ba eventu ne’e,” nia dehan.
Nia hatutan, responsável ba vizita ne’e la’ós iha Munisípiu Díli de’it mak halo preparasaun, maibé munisípiu hotu ida-idak halo nia preparasaun, no forma rasik sira-nia ekipa atu nune’e bele organiza ema mai tuir misa, tanba ne’e Munisípiu Díli halo preparasaun hodi haree ba komunidade sira ne’ebé hela iha Díli ne’e, husi munisípiu seluk sira mai ho sira-nia ekipa rasik.
Nia salienta, Munisípiu Díli bele ajuda de’it ekipa nasional sira hodi haree ba asuntu kiik sira ne’e hanesan halo limpeza no halo monitorizasaun ba fatin Amu Papa nian, nomós ba tau estaka tuir munisípiu ida-idak nian, maibé atu organiza ida-ne’e munisípiu ida-ida mak organiza nia ema sira.