- Publika iha: 30 Abril 2012
“Durante ne’e makina fase ran nian iha unidade rua deit, no durante fulan tolu nia laran atende deit pasiente ho moras rins, la ho moras da’et hanesan HIV/SIDA, Hepatitis no seluk,” hateten Administrador HNGV, Rui Manuel Gago Exposto, semana kotuk (23/04), iha Bidau Toko Baru, Dili.
Tuir Administrador Exposto, durante ne’e la fo asistensia ba pasiente ho moras da’et, ho razaun atu labele hada’et moras ba pasiente seluk.
“Iha Julhu tinan ne’e makina unidade rua se mai tan, tanba Ministeriu tau ona orsamentu no halo ona prosesu,” dehan Administrador Exposto.
Nia hatutan, ba pasienten sira ne’ebe ho moras infeksaun, HNGV fo surat rujukan ba sira atu halo tratamentu fase ran nian iha liur.
Enkuantu total pasiente la ho moras infeksaun ne’ebe halo tratamentu fase ran nian durante fulan tolu hamutuk nain neen, maske iha limitasaun ba rekursu umanu, maibe esforsu aan hodi asistensia ne’ebe diak ba pasiente sira.
Tuir nia, iha 2013, hakarak ka lakohi tenke prepara rekursu umanu ba area haemodilisa. “Tanba servisu iha area ne’e la’os fasil, presiza espesialista duni ba operasaun makina nian,” Administrador Exposto katak.
Iha parte seluk Membru Komisaun F Parlamentar, Deputada Ilda Maria da Conceição, nia parte la fo komentario kona ba planu ne’e, tanba la preve iha orsamentu jeral estadu 2012 nian.
“Foin dadauk hala’o diskusaun orsamentu jeral du estadu la tau atu hola makina, maibe karik ospital nasional iha osan atu hola, hau lahatene,” dehan Deputada da Conceicao.