Governu Xina Apoiu Farda ba Gravida Ba PNTL Femenina

Governu Xina liuhusi kooperasaun ne’ebé halo ho Polísia Nasional Timor-Leste (PNTL) durante ne'e fó ona apoiu farda ba gravida nian ba polísia femenina.

Komandante Kooperasaun no Relasaun Internasional Superintendente, Asistente Augusto Tilman da Costa, dehan farda ba gravida ba polísia femenina ne'e Governu Xina mak apoiu hotu liuliu orsamentu enkuantu parte komandu nian prepara mak produsaun dezeñu.

"Antes ne'e ita la iha farda gravida ba polísia femenina, entaun ita-nia polísia femenina sira-ne'e bainhira gravida uza de’it roupa sivíl, maibé depois de Governu Xina apoiu sira utiliza ona farda gravida ne'e hodi mai servisu bainhira sira gravida," nia hatete.

Nia dehan farda ne’ebé mak Governu Xina apoiu ne'e ba de’it númeru feto polísia ne'ebé mak dadaun ne'e hala’o knaar total husi nasional, munisípiu no esquadra.

"Ita iha feto hamutuk 400 kompostu husi kargu Xefia 76 no membru sira, hahú husi eskuadra to'o nasional," dehan Komandante Tilman.

Entretantu, Deputada Parlamentu Nasional Olinda Guterres dehan, farda ba gravida ba PNTL femenina ne’e, nesesáriu tebes atu sira bele utiliza iha momentu sira gravida, atu nune'e sira labele utiliza ropa sivil hodi ba servisu.

"Maske gravida maibé tenke uza farda uniforme, maibé farda ne’ebé merese ba inan isin rua sira no nia dezeñu labele lakon husi identidade PNTL nian," Deputada Guterres dehan.