- Publika iha: 19 Junho 2024
Prezidente Repúblika, José Ramos Horta dehan, simu kredensiál husi Embaxadór foun sira ne'ebé foin nomeadu husi nasaun tolu inklui Repúblika Argentina, Repúblika Chile no Repúblika Ghana atu hodi hametin relasaun amizade no koperasaun bilateral iha futuru.
Nia dehan, relasaun ho nasaun tolu refere durante luta ba independénsia Timor-Leste nian, tanba ne'e liuhusi sorumutu ida-ne'e bele hametin di’ak liutan relasaun.
"Simu Embaxadór foun sira no reforsa kompromisu Timor-Leste nian atu hametin relasaun amizade no koperasaun bilateral ho Argentina, Chile no Ghana hodi fó benefísiu mutual ba povu tomak," dehan PR Horta iha diskursu iha Palásiu Prezidensiál, Aitarak laran, Díli.
Iha okaziaaun ne'e mós embaxadór husi nasaun tolu ne'e aprezenta karta kredensiál nu'udar embaxador foun estraordináriu no plenipotensiariu ne'ebé mós rezidente iha Jakarta, Indonesia, ba Prezidenti Repúblika, José Ramos Horta.
Prezidente Horta haktuir, relasaun Timor-Leste nian liuhusi tempu naruk ho Argentina mai husu estabelesimentu relasaun diplomátika iha 2002. Nia simu koperasaun ne'ebé kontinua, inklui liuhusi akordu kooperasaun téknika 2013 ne'ebé fasilita interkámbiu no projetu konjunta sira.
"Prezidente Repúblika kongratula Embaxadór foun na'in tolu no hein atu servisu hamutuk ho sira hodi promove ajenda bilateral sira, reforsa ligasaun amizade nian no esplora parseria ne'ebé benefisia malu iha setór oin-oin iha tinan hirak oin mai," PR subliña.
Prezidente Horta hatutan, Timor-Leste hakarak atu hametin relasaun amizade ho nasaun hirak ne’e no enkoraja atu estabelese rezidénsia misaun diplomátika ida iha Díli hodi fasilita kooperasaun ne'ebé besik liu, inklui liuhusi forum multilaterál hanesan g7+ no CPLP.
Iha sorin seluk, Diretór Jeral Asuntu Bilateral Amérika, Europa no Áfrika Ministériu Negósiu Estranjeiru, Francisco Deoniso Fernandes "Maukura" hateten, Prezidente Repúblika simu karta kredensiál husi Embaxadór nain tolu ne'ebé rezidensia iha Jakarta, Indonesia, ne’ebé hakarak atu mai Timor-Leste.
"Embaxadór Argentina hakarak halo kooperasaun iha área agrikula nomós enerjia renovável no desportu. Nune’e mós ho pais Chile área ne’ebé importante ita hakarak atu halo ita-nia koperasaun hosiárea peska ne'ebé estratéjia liuliu iha área indústria liu ba ikan maran. No Ghana ita-nia relasaun di’ak hahú kedas iha tinan 1999 to'o mai Timor ukun an," nia dehan.
Nia hatutan, nasaun 3 ne'e importante tebes no nasaun 2 husi Amérika do Sul ida husi Áfrika, haree ba oin atu bele promove liutan interese estratéjiku iha kontinente Amerikanu liu-liu pais belun sira nomós iha kontinente Áfrika nian.