- Publika iha: 17 Julho 2024
Koordenadór Timor-Leste Coalition for Education (TLCE), Jose Monteiro, sujere ba Ministériu Edukasaun (ME) tenke investe iha Ensinu Sekundáriu Tékniku Vokasionál (ESTV) hodi bele hadia kualidade edukasaun iha Timor-Leste.
Nia dehan, tuir monitorizasaun ne’ebé mak sira halo espesífiku ba ESTV katak maioria la iha ekipamentu prátiku, infraestrutura la di’ak, inkliu menus professór sira ne’ebé mak iha kualifikasaun hodi transforma siénsia ba estudante sira.
"Ita husu ba Ministériu Edukasaun tenke investe iha Ensinu Sekundariu Tekniku Vokasionál liuhusi ezekusaun orsamentu hodi bele hadia kualidade edukasaun iha Timor-Leste no prepara estudante sira asesu ba kampu traballu no kria rasik kampu servisu," nia informa.
Nia dehan, ESTV ne'e kontribui tebes ba kualidade edukasaun, tanba estudante sira aprende teoria no prátika kedas, no kada tinan sira sempre sai primeiru lugar iha Ezame Nasionál.
"Ita haree estudante sira husi matéria ne’ebé sira aprende teoria no prátika ne'e ita haree iha loron pameran edukasaun nian sira bele halo bengkel, instalasaun ba eletrisidade, no hadia sasan eletróniku, balun bele halo dosi ne’ebé mak di’ak tebes no seluk tan," Koordenadór TLCE Monteiro dehan.
Tanba ne'e nia husu ba governu liuhusi ME tenke investe iha orsamentu jeral estadu hodi bele halo dezenvolvimentu ba kualidade edukasaun liuliu iha ESTV iha Timor-Leste.
Entretantu, Diretór Nasionál ESTV iha ME, Fernando Mouzinho, dehan loos duni katak ESTV menus rekursu umanu iha área produtivu no menus ekipamentu prátika.
"Ita menus profesór liu-liu iha área produtivu nain, kuaze ita teritóriu laran tomak no nune’e mós ita halerik ba ekipamentu prátika," nia informa.
Tanba ne'e nia dehan, atu rezolve problema hirak ne'e ME halo ona levantamentu dadus ba eskola ESTV sira hotu iha rai laran no diresaun sei halo esforsu makas hodi bele rezolve ho fazeadamente tuir kbiit ne’ebé mak iha.