- Publika iha: 21 Setembro 2024
Diretór Adjuntu Leopoldino Pereira hateten, Ensinu Bazika Central (EBC) 05 Welolo iha Suku Luka, Aldeia Uma Boot, bainhira tempu udan sira hala’o prosesu aprendizajen iha uma de'it.
Nia dehan, bainhira tempu udan estudante sira-ne’e halo prosesu aprendizajen iha uma de'it, tanba mota Welolo liu la di'ak, entaun estudante sira eskola iha komunidade sira-nia uma de'it.
“Prosesu aprendizajen iha uma de'it, tanba mota Welolo kuandu udan boot sa'e to’o kedas iha eskola, entaun ami ba husu komunidade sira-nia uma hodi hanorin estudante sira-ne’e, depois udan para mota la iha ona, entaun ami ba fali eskola,”nia hateten liuhusi via-telefone.
Nia esplika, prosesu aprendizajen ne’e fahe tiha, profesór sira balun hanorin iha mota sorin ba, balun hanorin iha mota sorin mai, bainhira udan para foin ba eskola hanesan baibain.
“Ami profesór fahe malu tiha bainhira tempu udan, ami balun hanorin iha sorin, balun hanorin iha sorin, tanba mota boot entaun ami tenke fahe malu. Ami iha ne’e estudante hamutuk 71 estudante sira-ne’e mai husi aldeia ida de'it, mak aldeia Uma Boot no profesór hamutuk 14 mak hanorin, tanba ne’e bainhira tempu udan ami fahe malu tiha hodi ba hanorin estudante sira tuir uma de'it,” nia esklarese.
Iha parte seluk, reprezentante Prezidenti Autoridade Munisipio Viqueque Luis Antonio da S. Soares hateten, eskola EBC ida iha Welolo ne’e tempu udan sira labele halo prosesu aprendizajen tanba mota boot.
“Ensinu Bazika Sentral 05 Welolo ne’e bainhira tempu udan estudante sira-ne’e la bele ba eskola, entaun profesór sira ne’ebé hela iha moto sorin ne’e hanorin de'it sira iha uma, sira seluk fali iha mota sorin profesór sira iha ne'ebá mak hanorin sira, tanba udan boot ne’e mota welolo liu la di'ak, nakonu tama to’o kedas eskola tanba ne’e bainhira tempu udan sira labele ba eskola,” nia dehan.
Nia hatutan, agora dadaun Autoridade Munisipiu Viqueque komesa ona halo kontatu ba Ministériu Obras Públika, atu haree ba problema ne’e.
“Ministériu Obras Públika liuhusi IGE (Instituto de Gestão de Equipamentos) sira mai haree ona, oinsá mak atu halo reabilitasaun ba ponte Welolo ne’e, tanba ne’e sira mai haree ona ita hein de'it bainhira mak sira atu halo servisu,” nia salienta.