- Publika iha: 23 Setembro 2024
Akadémiku husi Universidade Nacional Timor Lorosa'e (UNTL) José Magno hateten, sosiedade sivíl sira tenke servisu ho loloos hodi defende povu no labele haree ba kór partidu nian.
Nia dehan, knaar sosiedade sivíl iha dezenvolvimentu nasionál importante, tanba ne’e tenke servisu ho loloos liuliu hodi defende povu ida-ne'e nia direitu.
"Ha’u atu dehan de'it katak, servisu sosiedade sivíl nian durante ne'e di'ak tebes, maibé sosiedade tenke servisu ho loloos hodi defende povu ida ne'e, labele servisu haree fali ba kór partidu nian, ida-ne'e la di'ak, tanba ne'e husu ba sosiedade sivíl sira hotu atu servisu ho lolos," Nia esplika hafoin abertura ba atividade Seminário Nasional ho tema haforsa knaar sosiedade sivíl iha dezenvolvimentu nasionál, iha Salaun CNE, Kolmera, Díli.
Diretór Ezekutivu Forum Organizasaun Non Govenamental Timor-Leste (FONGTIL), Valentim da Costa Pinto hateten, ONG hanesan komponente ki'ik ida husu sosiedade sivíl hala’o knaar hanesan forsa balansu ida hodi haree ba polítika iha rai-laran.
"ONG ne'e hanesan komponente ki'ik ida ne'ebé mai husi Sosiedade Sivíl, ne'e halo nia knaar oinsá atu bele halo balansu ba polítika sira ne'ebé ita-nia ukun na'in sira hala’o, hodi bele fasilita nia lala'ok sira iha terenu," nia dehan.
Nia esplika, Sosiedade Sivíl nafatin halo nia servisu hodi haree ba asaun polítika sira ne'ebé akontese iha rai ida-ne'e no nafatin servisu hamutuk ho governu no entidade hotu atu oinsá bele rezolve problema sira ne'ebé akontese iha rai doben ida ne'e.
"Ami-nia servisu sira hanesan advokasia bele hetan espasu no konsiderasaun iha prosesu dezenvolve polítika públika no intervensaun tékniku sira ne'ebé presiza halo iha ministériu hotu liuliu sira diskute kona-ba orsamentu estudu nian," nia afirma.