- Publika iha: 11 Maio 2018
Pasiente (foun) ne’ebe tama baixa iha sala internamentu iha Ospital Nasional Guido Valadares (HNGV) hahu dia 3 fulan Maio ba leten sei la tuir votasaun ba eleisaun antisipada, tanba sira nia naran la tama iha lista ne’ebe submete ba iha Sekretariado Tekniku Administrasaun Eleitoral (STAE).
Diretor Administrativu Finansas e Logistika HNGV, doutor Mendes Pinto hateten tanba lista pasientes + familia ida inklui funsiunario ospital nia ne’ebe hala’o knar iha loron elisaun (12 Maio) submete ona iha dia 2 Maio ba STAE.
Tanba tuir lei eleitoral, nia dehan naran eleitores ambulatorio tenke submete ba STAE iha loron 10 antes tama ba loron elisaun nian.
“Lista ami hatama tiha ona, ba sira ne’ebe naran iha lista maibe sira alta ona husi HNGV sira fila vota iha ida –idak nia suku no ba sira ne’ebe mai baixa depois lista submete ona sei la vota, tanba sira nia naran laiha iha lista,” nia hateten iha servisu fatin Bidau, Dili.
Nia hateten, iha mudansa ba sistema tanba elisaun tinan kotuk STAE husu HNGV halo kalkulasaun deit ba ema ne’ebe atu vota iha ospital no submete numeru ba STAE, maibe tinan ida ne’e tenke hatama naran sira hotu ne’ebe sei tuir votasuan .
Nia hateten, ba pesoal saude sira laiha problema tanba HNGV iha ona orario servisu ne’ebe permanente ba sira, maibe pasiente no familia pasiente sira sei lakon sira nia direitu.
Nia informa, total naran ne’ebe submete ona ba iha STAE hamutuk ema nain 364, ne’ebe kompostu husi pasientes, familia pasiente ida no profesional saude sira inklui pesoal seguransa sira ne’ebe hala’o knar iha loron elisaun.
Hatan ba kesaun ne’e, Diretor Jeral Sekretariado Tekniku Administrasaun Eleitoral (STAE) Acilino Manuel Branco rekonese mudansa ida ne’e no mudansa ne’e regula iha dekretu lei numeru 4/2018.
“Sira (eleitores) ne’ebe naran tama tiha ona mak alta, sira fila ba vota iha sentru votasaun iha sira nia suku, ba sira ne’ebe tama mai depois lista submete ona sei la vota tanba lei mak haruka,” nia hateten.
Nia dehan, STAE organiza prosesu tomak tuir lei haruka, STAE lahalo servisu ne’ebe fora husi lei tanba ne’e se lei dehan labele, sira sei lavota.
Nia hateten, tuir lei eleitoral mos dehan votasaun ambulatorio sei hala’o deit iha HNGV, Ospital Referal 5 hanesan Baucau, Maubessi, Maliana, Suai, Oe-Cusse no prizaun Becora, Gleno no Covalima.
Nia hatutan, ba pasiente sira ne’ebe baixa iha sala internametu sentru saude, sira mos laiha direitu atu vota tanba lei la fo dalan.
