- Publika iha: 05 Março 2024
Diretór Ezekutivu Institutu Apoiu Dezenvolvimentu Empresarial (IADE), Filomeno Marcelino Belo hateten kompetisaun planu negosiu inovativu dala-X iha tinan 2024, foku ba setór hortikultura ho hanoin bele hamosu joven emprendedorismu barak liu tan iha setór ida ne’e hodi kontribui ba hasa’e produsaun rai laran.
Nia dehan prosesu rejistrasaun ba partisipante sira hahu ona iha nivel munisípiu hotu. Depois partisipante sira sei tuir formasaun faze primeiru no halo selesaun atu hakat ba formasaun faze segundu konaba elabora planu negosiu hodi aprezenta ba ekipa juri iha nivel munisípiu hodi hetan ema nain 10 atu kompete fali iha nivel nasionál.
“Tinan-tinan ami sempre halo mudansa ba area prioridade, liu-liu setór sira ne’ebe sai prioridade. Entau tinan ne’e ita hili setór hortikultura tanba liga ba politika governu nian atu hasa’e ita nia produtu lokal, kresimentu ekonomia atraves husi potensialidade ne’ebe ita iha.
Ita iha Dili, hetan hahan mai husi foho entau ita tenke habarak ita nia hahan hakarak lakohi ita tenke investe duni ba ita nia joven sira para halo buat ruma iha area pontensial sira hodi kontribui ba dezenvolve ita nia ekonomia,” nia hateten hafoin partisipa serimonia lansamentu kompetisaun planu negosio invovativu 2024, sub-setór hortikultura “Kuda ba Moris Diak”iha Hotel Novu Turismu Lecidere, Dili.
Nia hateten partisipante nain 10 ne’ebé tama iha kompetisaun nivel nasionál sei hetan sertifikadu no fundu maximu $7,000 no minimu $700 ba sira ne’ebé la manan iha kompetisaun. Alende osan sira mos hetan akompañiamentu negosiu husi ekipa IADE durante tinan rua.
“Nian 10 ne’e manan tiha premiu ami sei la husik sira, maibe ami sei akompañia sira maximu tinan rua atu ajuda trata sira nia lisensiamentu negosiu, buka merkadu ba sira, sira nia kapital menus ami fasilita asesu ba kreditu no ajuda buka fornesedor ba sira. Sira susesu ona no prontu lao mesak ami husik sira,” nia hateten.
Nia hatutan durante implementasaun kompetisaun planu negosiu inovativu iha inisiu to’o fali dala sanulu (10) ne’e, produs ona joven empendedorismu barak iha area oioin no purvolta 65% susesu tanba sira kontribui ona taxa ba estadu no loke kampu serviu ba ema seluk.
Nia haktuir kriteria ba partisipante sira mak tenke nasionalidade timorense, idade minimu 17 até 45 no iha planu negosiu ne’ebé inovativu.
Nia informa orsamentu tinan 2024, ba kompetisaun planu negosiu inovativu ho montante $600,000, ne’ebé $35,000 apoiu ba joven emprendedorismu atu hahu atividade.
Entretantu, Vice Presidente Empoderamentu Institusionál, iha Asosiasaun Empresarial Feto Timor-Leste (AEMTL), Jacinta Abucau Pereira hateten sira sei habelar informasaun no enkoraja joven feto sira ne’ebé iha hanoin inovativu hakarak halo negosiu iha setór hortikultura bele partisipa iha kompetisaun ne’e atu halibur kapital hodi hahu investe iha setór ne’e.
“Ita hare kompetisaun iha tinan kotuk nian ne’e partisipasaun feto minimu loos. Ami espera iha tinan 2024, partisipasaun feto emprendedorismu sira ne’ebe iha ona ideia,” nia hateten
Nia hatutan sira iha kopera ho autoridade munisípiu Dili, fo ona formasaun ba joven sira hamutuk nain 20 no iha fulan-abril tinan 2024, sei loke mos kompetisaun negosiu ba sira.
Iha parte seluk, Sekretariu Estadu Pekuaria, José Veira hateten programa kompetisaun ne’e hanesan revolusaun mentalidade sosiedade nian, liu-liu joven sira atu fila ba munisípiu dezenvolve setór agrikultura hodi hasa’e produsaun rai laran.
“Setór hortikultura ne’e kapas oinsa atu hasa’e produsaun hanesan saida mak hatur ona iha programa governu konstitusional nia meta katak iha tinan lima nia laran 2023-2028, ita hakarak hasa’e ba 70%. Entau passu ne’e importante los ba joven emprendedorismu tantu feto no mane,” nia hateten.
Nia enkoraja joventude sira tantu feto no mane ne’ebé iha ideia inovativu aporveita oportunidade aprende no halibur kapital hodi hahu investe iha setór agrikultura.