Terça, Maio 21, 2024
Total visitors: 766366

Komadante Jéral Polisia Nasionál Timor-Leste (PNTL), Komisariu Polisia Henrique da Costa informa membru PNTL barak mak sofre moras stroke labele ativu halo servisu maximu tanba ne’e rekursu limitadu no presiza halo rekrutamentu foun hodi halao servisu asegura paz no estabilidade iha rai laran.

Komadante Jéral Polisia Nasionál Timor-Leste (PNTL), Komisariu Polisia Henrique da Costa informa membru PNTL barak mak sofre moras stroke labele ativu halo servisu maximu.

Nia dehan hahu tinan 2000 mai to’o 2023, membru hamutuk na’in 126 mak lakon vida ona tanba sofre moras kronika hanesan stroke, kurasaun no balun mos iha asidente.

“Ita nia moras permanente mos iha hela balun stroke no moras seluk la tama servisu iha tanba ne’e ita hateten katak membru polisia agora dadaun ne’e iha na’in 4028, maibe ita hasai tiha sira moras permanente ne’e, sira ba formasaun iha rai liur, eskoltu hela altu entidade sira, entau membru ne’ebe iha halo servisu ne’e minimu tebes tanba ne’e ita husu rekrutamentu iha tinan 2024,” nia hateten hafoin partisipa iha serimonia tomada posse ba komadante munisípiu sira no kargu xefe iha PNTL, iha Komandu Jeral Caicoli, Dili.

Nia hateten komandu instala ona komisaun ba rekrutamentu nian no revizaun ba regras rekrutamentu sira inklui kurikulum formasaun nian.

Nia hatutan bazeia ba orsamenetu ne’ebé koloka iha tinan 2024, vaga ba membru polisia efetivu foun hamutuk na’in 200.

Konaba membru polisia sira ne’ebé sofre hela moras, nia dehan PNTL bazeia ba lei organika instala ona departamentu saúde ne’ebe mediku sira halao hela tratamentu ba membru polisia sira to’o iha munisípiu sira no halo mos komunikasaun ho mediku espesialista sira iha hospital nasionál atu halo tratamentu kontrola ba membru sira.

Iha parte seluk, Diretór Ezekutivu Organizasaun Fundasaun Mahein (FM), Nelson Belo apresia ho prestasaun servisu husi autoridade seguransa tantu PNTL no FALINTIL-Forsa Defeza Timor-Leste (F-FDTL), ne’ebé servisu makas asegura seguransa iha rai laran, liu-liu iha periodu natal no tinan foun 2023.

“Ita orgulho ba ita nia autoridade seguransa sira tantu PNTL no F-FDTL hamutuk ho lideransa komunitaria sira nia involvimentu ba seguransa ne’ebé diak iha tempu loron bo’ot natal no ano novu,” nia hateten.

Nia hateten PNTL sei enfrenta dificuldade barak no dalabarak hetan dezrespeita husi sosiedade sivil sira. Maibe atu garantia seguransa no protesaun ba sidadaun, sira iha knar tomak atu hatudu orden ba ema hotu labele ataka arbiru.