Quinta, Julho 18, 2024

Diretór Ezekutivu Unidade de Missão para o Combate ao Stunting (UNMICS), Joel Maria Pereira informa governu, liu husi liña ministériu relevante sira ho parseiru sira tantu agensia internasionál no Organizasaun Sosiedade Sivil, elebora hela planu asaun nasionál kombate stunting ka raes badak, hodi guia institusaun hotu nia servisu intervensaun sira ba kombate malnutrisaun iha rai laran.

Diretór Ezekutivu Unidade de Missão para o Combate ao Stunting (UNMICS), Joel Maria Pereira informa governu, liu husi liña ministériu relevante sira ho parseiru sira tantu agensia internasionál no Organizasaun Sosiedade Sivil, elebora hela planu asaun nasionál kombate stunting ka raes badak.

Nia dehan durante ne’e, governu ho apoiu husi parseiru sira halo tiha ona investimentu ba kombate malnutrisaun, maibe seidauk maximu tanba institusaun ida-ida halao nia servisu. Entau ho planu asaun ne’e bele ajuda governu estabelese mekanismu adekuadu hodi responde ba problema deznutrisaun ba labarik sira.

“Ita hotu-hotu preokupa oinsa ita bele iha mekanismu kordenasaun ne’ebe diak no efetivu tanba iha ajente no parte barak tantu NGO no parseru dezenvolvimentu inklui governu liña ministeriu sira ne’ebe durante ne’e halao hela intervensaun. Maibe oinsa ita bele defini mekanismu kordenasaun ida diak atu hotu-hotu iha knal ida deit para monitoriza no kontrola intervensaun oion sira ne’ebe halo no ikus mai ita hare se mak halo saida, halo iha ne’ebé no to’o iha ne’ebé ona, ne’e mak sai hanesan ideia prinsipal ida ita presiza tau hamutuk iha planu asaun ida ne’e,” nia hateten iha forum konsultasaun nasionál konaba Planu Asaun Nasionál Kombate Stunting (PANKOS) iha salaun City 8 Manleuana.

Nia hateten governu deklara ona to’o tinan 2030, tenke redus ona taxa malnutrisaun, liu-liu raes badak husi 47% tun ba 25% tanba ne’e tenke importante atu iha planu asaun ida hodi konsolida investimentu sira no orienta servisu intervensaun sira ba grupo alvu.

“Ita rasik governu defini ona iha ita nia dokumentu consolidated national action plan for nutrition and food security hateten katak iha tinan 2030, ita tenke hatun numeru stunting ba 25%. Agora ita iha 2024, signifika ita falta tinan neen deit ona, entau ita kuandu ida-ida halo intervensaun laiha orgaun ida mak kontrola netik ida ne’e sai hanesan dezafiu ida,” nia haktuir.

Tuir dadus Timor-Leste Food and Nutrition Survey 2020, taxa stunting ka raes badak ba labarik sira idade menus tinan lima iha 47, 1%, krekas 8, 6%, todan menus 32.1% no anemaia 63,2%.

Entretantu, Presidente Autoridade Munisípiu Ermera, José Martinho dos Santos Soares hateten labarik idade menus tinan lima ne’ebé sofre raes badak iha munisípiu Ermera sei aas 43%, maibe husu atu halo analiza ida klean tanba populasaun Ermera maioria badak.

“43% labarik iha munisípiu Ermera stunting, maibe ita presiza hare mos fator seluk hanesan jerasaun ka jenetika. Hau ladun konkorda, maibe ida ne’e numeru ne’ebé ema hotu-hotu koalia iha públiku katak Ermera mak barak liu,” nia hateten

Nia dehan Ermera taxa malnutrisaun aas, liu-liu stunting tanba mos numeru populasaun ho idade menus 16 mos barak 45% husi total populasaun 140000.

Nia hateten deznutrisaun ne’e problema nasionál no sai preokupasaun nasaun nian tanba ne’e importante governu tenke iha politika ida diak no investimentu ne’ebé adekuadu atu rezolve, liu husi hasa’e produsaun aihan atu ema hotu iha asesu ba disponibilidade aihan, eduka komunidade sira konsumu aihan ne’ebé saudavel ho sufisiente, fo akonselamentu ba familia prepara aihan ne’ebé nutritivu ba oan sira tanba ho ida ne’e mak bele redus taxa malnutrisaun.

Iha parte seluk, expertu Dr Felix Phiri hateten Timor-Leste iha posibilidade atu redus taxa malnutrisaun tanba iha rekursu hotu intermus dokumentu politika sira, liña minsiteriu sira, organizasaun sosiedade sivil sira no parseru dezenvolvimentu. Maibe importante mak tenke kosolida reskursu sira ne’e hamutuk hodi responde ba problema ne’e.

“Iha Timor-Leste imi iha baut hotu-hotu, imi iha entidade, faramentas, dokumentu politika, institusaun hotu iha, maibe ita hare nutrisaun Ministeriu Saúde deit mak iha responsabilidade atu halao knar ne’e,” nia hateten.

Nia hateten stunting ne’e problema sosial ne’ebé tenke iha mekanismu kordenasaun husi parte hotu-hotu atu entidade hotu-hotu halao knar.

Nia hatutan Ministeriu Agrikultura Peskas, Pekuaria no Floresta (MAPPF) laiha unidade nutrisaun no laiha funsionariu didikadu. Iha Ministeriu Edukasaun eziste unidade, maibe laos nutrisionista, iha Sekretaria Estadu Igualidade no Ministeriu Solidaridade Sosial no Inkluzaun (MSSI) mos la involve maximu. Nune’e mos iha nivel munisípal laiha funsionariu didikadu parte saúde deit mak iha nutrisionista.