Quinta, Junho 13, 2024
Total visitors: 766366

Superintendente Polisia, Umbelina dos Santos Soares hetan konfiansa husi Komadante Jéral Polisia Nasionál Timor-Leste (PNTL), Komisariu Polisia Henrique da Costa kaer kargu nu`udar komadante munisípiu Manatuto, durante periodu tinan haat (4).

Superintendente Polisia, Umbelina dos Santos Soares hetan konfiansa husi Komadante Jéral Polisia Nasionál Timor-Leste (PNTL), Komisariu Polisia Henrique da Costa kaer kargu nu`udar komadante munisípiu Manatuto, durante periodu tinan haat (4).

Komandante Superintendente Umbelina dos Santos Soares feto dahuluk ne’ebé hetan fiar lidera PNTL iha Munisipiu Manatuto, no nia sente kontente no prontu servisu hamutuk ho komunidade no autoridade sira hotu atu asegura seguransa, paz no estabilidade.

“Hau hanoin estratejia ne’ebé hau utiliza bainhira hanesan komandante munisípiu Liquiça sei implementa mos iha munisípiu Manatuto, mak hakbesik aan ba komunidade no kria koperasaun servisu ne’ebé diak ho autoridade no kualker ema hotu ne’ebé hakarak servisu hodi kontribui ba paz no estabilidade,” nia hateten hafoin simu tomada posse iha Komandu Jeral Caicoli, Dili.

Nia hateten esperiensia ne’ebé hetan iha kargu antes hanesan komandante munisípiu Liquiça mak komunikasaun no servisu hamutuk tanba ne’e enkoraja komunidade no autoridade sira atu hamutuk kria paz no estabilidade.

Nia hatutan esperensia kazu ne`ebé rejista aas iha munisípiu Liquiça mak kazu violénsia doméstika, asidente no insidente, ne’ebé sira atende tuir lei ne’ebé vigor iha rai laran.

Iha parte seluk, Komadante Jéral PNTL, Komisariu Polisia Henrique da Costa hateten promosaun feto iha kargu lideransa lao hela tanba feto barak mak kaer kargu komandu unidade, departamentu, iha PNTL laran.

“Hau nafatin atribui konfiansa komandu nian ba ita bo’ot sira komandu munisípiu sira, xefe gabinete sira, komadante unidade apoia servisu no komandante sira hotu atu halao servisu ho responsabilidade,”

“Xave ida ba ita nia susesu mak komunikasaun, ita dalaruma hare katak it abele halo buat hotu no hatene buat hotu, maibe se laiha apoia husi membru nian no komunidade ida ne’ebe ita servisu ba ita sei la hetan susesu tanba ne’e hare didiak ba ita nia komunikasaun,” nia hateten.

Nia konsiente PNTL enfrenta difikuldade barak tantu limitasaun rekursu umanu, fasilidade, ekipamentu radio komunikasaun, transporte tanba ne’e importante jere kondisaun saida deit mak iha atu halo servisu.

Nia hatutan Orsamentu Jeral Estadu tinan 2023, sosa ona ekipamentu radio komunikasaun balun, transporte no farda, ne’ebé sei halo distribuisaun ba munisípiu sira hodi fasilita servisu, bainhira prosesu administrasaun remata ona.