- Publika iha: 03 Fevereiro 2024
Diretór Jeral iha Ministeriu Solidaridade Sosial no Inkluzaun (MSSI), Florencio Pina Dias Gonzaga hateten alterasaun daruak ba dekretu lei no. 18/2012, loron 4 fulan-abril ne’ebé kria subsidiu apoio kondisionál ou Bolsa da Mãe aprezenta valór subsidiu mensál ba labarik husi familia vulneravel iha ensino primaria ho valór U$8, ensino pre-sekundaria valór U$9 no ensino sekundariu U$10. No benefisiariu sira ne’ebé indentifika ho kondisaun defisiénsia hetan adisional U$ 5.
Nia dehan sidadaun ne’ebé elejivel ba subsidiu ne’e mak labarik ho idade tinan 6 até ne’ebé kondisaun familia vulneravel tebes tanba objetivu husi subsidiu ne’e atu ajuda labarik sira ne’e asesu ba edukasaun.
“Liu husi aprovasaun orsamentu ne’ebé iha katak labarik husi familia vulneravel ne’ebé ho idade eskolar uluk sira hetan subsidiu mensál ho valor hanesan U$5, maibe agora sira ne’ebé primaria U$8, pre-sekundaria $9, sekundaria $10. No bainhira identifika mai husi familia vulneravel ho kondisaun defisiénsia sei hetan adisionál U$5 kada fulan,” nia hateten hafoin partisipa wokshop ho tema Kria Orsamentu Bazea ba Direitu Ema ho Defisiénsia mak Pratika Diak no Justo hodi la Husik Ema Ida iha Kotuk, iha Hotel Vila Verde, Dili.
Nia hateten iha tinan 2023, sira konsege halo pagamentu ba benefisiariu bolsa da mãe kondisionál hamutuk 41000 resin, maibe sira halo hela reajustamentu ba dadus tanba ne’e numeru bele tun no posibilidade sa’e.
Nia hatutan alokasaun orsamentu tinan 2024, ba programa subsidiu bolsa da mãe kondisionál ho montante $6,000,000.
Iha parte seluk, Komunidade Maria Soares husu governu reforsa servisu sosial iha nivel munisípal sira atu sosializa informasaun sira to’o area rural no simplifika rekejitus sira atu subsidiu ne’e bele benefisia duni familia kibi’it laek sira iha area remota.
“Iha area rural ita hare familia balun presiza tebes apoio subsidiu, maibe la asesu tanba la hetan informasaun,” nia hateten.
Nia hateten importante mos tenke halo monitorizasaun ba implementasaun programa hodi hare impaktu subsidiu ba benefisiariu sira nia moris, liu-liu sira nia estudu.