Domingo, Abril 21, 2024
Total visitors: 766366

Autoridade lokál suku Caicoli, Postu-Administrativu Vera-Cruz, Munisípiu Díli, apela ba komunidade atu prevene moras denge liuhusi limpeza beibeik iha uma-huun.

Autoridade lokál suku Caicoli, Postu-Administrativu Vera-Cruz, Munisípiu Díli, apela ba komunidade atu prevene moras denge liuhusi limpeza beibeik iha uma-huun.

Xefe suku Caicoli, Hipolito Marques Sarmento, hateten liuhusi sirkualár konsellu suku Caicoli nian hatuur katak, kada xefe aldeia sira atu avizu ba komunidade atu limpeza iha sira-nia rasik.

“Ami iha servisu sirkulár entre membru konsellu suku ho komunidade, entaun xefe aldeia idaidak ami avizu hotu ona, atu sira kontinua ba avizu ita-nia komunidade no haree ita-nia ema sira-ne’e. Hanesan ohin ha’u koalia tiha ona katak haree sira atu hamoos uma-huun halo moos, nune’e labele hetan moras denge”, nia fó-sai iha nia servisu fatin sede suku Caicoli.

Nia hatutan, esforsu ne’ebé durante ne’e sira halo ho parte saúde nian, la’o di’ak tebes konsegue organiza komunidade atu hetan konsulta hodi prevene aan husi denge no tenke hamoos vazu, valeta,no seluk tan.

“Ne’ebé foin lalais ami Caikoli, ami iha denge maibé ami konsegue organiza sira ba konsulta, agora dadaun balun fila ona. Ne’e signifika ita tenke hadook aan husi denge, mak tenke halo limpeza ita-nia uma, vazu, valeta, haris-fatin, no área seluk besik uma-huun no tenke limpeza beibeik ho di’ak para moras ne’e labele kona ita arbiru”, nia dehan.

Iha parte seluk husi Xefe Sentru Saúde Vera-Cruz, Marilia Fereira da Conseção Piedade, informa esforsu ne’ebé halo mak durante ne’e, halo ona mitigasaun ba moras denge, fahe aimoruk abate no sira halo ona promosaun saúde no iha tempu badak sei halo fumigasaun iha bairro sria, atu bele prevene moras denge.

“Husi sentru saúde vera cruz halo mitigasaun ba moras dengue hanesan fahe abate ho halo observasaun ba larva sira hodi prevene. Tempu badak sei halo fumigasaun iha komunidade nia leet hodi prevene moras denge. Maibé iha parte promosaun saúde la’o di’ak, ida-ne’e importante tebes, tanba denge ne’e kada tinan aumenta beibeik, bainhira udan monu rai,” nia hato’o.

Nia mós apela ba inan-aman atu antisipa moras denge ne’e, atu hamoos aredór uma ninin, troka bee ne’ebé nalihun iha lata laran, roda aat sira hakoi tiha, tanba susuk mosu husi ne’e barak, dalan di’ak mak tenke uza ropa naruk no toba uza mosquiteru.

“Ita antisipa para labele monu ba komplikasaun ne’ebé mak ita la espera. Bainhira toba meiudia tenke uza repelente, uza faru liman naruk no kalsa naruk, di’ak liután husi jam 6 dader to’o jam 6 loraik bainhira toba tenke toba iha mosquiteiru laran,” nia haktuir tan.