Quinta, Julho 18, 2024

Diretór Ezekutivu Fundasaun Mahein (FM), Nelson Belo konsidera konfrontu ne’ebé akontese beibeik iha kapital Díli laran, la'ós mai husi grupu arte marsiais, tanba durante ne’e governu suspende tiha ona sira-nia atividade.

Diretór Ezekutivu Fundasaun Mahein (FM), Nelson Belo konsidera konfrontu ne’ebé akontese beibeik iha kapital Díli laran, la'ós mai husi grupu arte marsiais.

Nia dehan, politikamente la iha arte marsiais ne’e joven puru, tanba governu suspende tiha ona atividade grupu arte marsiais nian, entaun konflitu ne'ebé iha, ne’e joven sira mak halo la'ós grupu arte marsiais.

“Ha’u prefere bolu sira eis arte marsiais kuandu ha'u ko'alia kona-ba legál nian, se ha'u ko'alia kona-ba buat ne’ebé loos ne’e ha'u prefere eis arte marsiais. IX governu kuandu tama depois fulan hira, suspende kedas atividade arte marsiais ka lae, signifika atividade arte marsiais ne’e suspende tiha ona,” nia hatete iha nia servisu fatin, Dili.

Nia haktuir, agora daudauk ne’e buat ki'ik boot dehan arte marsiais, bainhira halo kapturasaun to’o iha tribunál, tribunál absolve tiha signifika katak tribunál la uza buat ne’ebé ema temi naran ne’e, tribunál utiliza evidénsia entaun, politikamente arte marsiais ne’e la iha, tanba governu suspende tiha ona sira-nia atividade, maské ema sei temi nafatin naran arte marsiais.

“Ita sei la sai husi siklu malisan aat ida-ne’e. Ita hanesan ne’e de'it só ita-nia boot sira komesa hanoin ona labele kria konflitu boot ona, labele tan ona kria krize polítiku hanoin ba dezenvolvimentu nasionál ida ne’e, no investimentu ba umanu ne’e sai mós mega projetu entaun bele,” nia salienta.

Iha fatin seluk, Koordenadór Persaudaraan Setia Hati Terate (PSHT), Dom Aleixo nian, Renato Doutel, hateten, dadaun ne’e governu suspende hela atividade arte marsiais nian, tanba ne’e hanesan koordenadór la halo buat ida, tanba atividade organizasaun la iha, joven sira ne'ebé halo problema iha bairru laran ne’e tanba lanu, entaun ikus sira problema.

“Arte marsiais agora governu suspende hela, tanba ne’e problema akontese ne’e la'ós arte marsiais. Membru arte marsiais mós la bele, se arte marsiais mak tun ba ne'ebá halo ezersísiu mak iha problema hanesan ne’e ami lider mak responsabilidade, tanba orientasaun husi lider, agora ida ne’e akontese tanba juventude sira iha bairru laran,” nia hateten.

Nia informa tan katak kona-ba regulamentu ne'ebé governu fó, arte marsiais bele halo enkontru ho estrutura arte marsiais nian, maibé konfrontu ne'ebé akontese beibeik iha bairru laran ne’e la'ós iha atividade arte marsiais, tanba ne’e akontese iha baruk laran.