Membru PNTL Na’in 18 Ona Mak Partisipa Iha Misaun Apoiu Páz ONU

Polísia Nasionál Timor-Leste (PNTL) durante ne’e haruka ona membru na’in 18 ba partisipa iha misaun apoiu páz ONU nian.

Komandante Jerál PNTL, Komisáriu Henrique da Costa dehan, membru na’in 18 ne’ebé mak partisipa ona iha misaun apoiu páz ONU ne’e hahú iha 2005 to’o 2020 iha nasaun tolu hanesan, Cosovo, Guine Bisaun no Sudaun do Sul.

“Ita-nia membru na’in 18 ne’e primeiru ba hala’o misaun apoiu páz ONU iha Cosovo hahú husi tinan 2005 to’o 2007, Gine Bisaun iha tinan 2010 to’o 2013 no iha Sudaun do Sul iha tinan 2020 to’o 2022,” nia dehan.

Nia dehan, membru hirak ne’ebé partisipa iha misaun apoiu páz ONU ne’e bazeia ba rekomendasaun ne’e mak hato’o husi ONU nian, tanba ne’e mak durante ne’e foin iha membru na’in 18 mak partisipa.

Tanba ne’e nia dehan, dadaun ne’e PNTL servisu hamutuk ho ONU iha Timor-Leste hodi apoiu formasaun ba membru polísia sira iha espesífiku kona-ba oinsa misaun apoiu páz ONU nian, nune’e bainhira teste hodi partisipa iha apoiu páz ne’e membru sira iha ona kapasidade hodi kompete.

“Formasaun ne’ebé apoiu husi ONU ne’e hodi prepara sira ba futuru, iha teste ba misaun ONU na’in karik sira iha ona koñesimentu. Ida-ne’e mak ita hakarak halo nune’e bele aumenta númeru PNTL partisipa iha misaun apoiu páz ONU nian,” Komisáriu PNTL Costa dehan iha CFP Comoro, Díli.

Nia dehan, dadaun ne’e PNTL ho ONU hahú prepara ona membru sira iha etapa primeiru ne’e iha membru na’in 60, nune’e futuru karik iha misaun apoiu páz ONU nian, sira bele kompete.

Iha fatin hanesan ONU nia Reprezentante, Amy Nishta Satyam dehan ONU iha Timor-Leste nafatin apoiu kapasitasaun ba membru polísia sira, nune’e bele hasa’e taxa partisipasaun iha misaun apoiu páz ONU nian.

Nia dehan, membru na’in 18 ne’ebé antes ne’e partisipa iha misaun apoiu páz ONU ne’e liuhusi selesaun ne’ebé ONU realiza bazeia ba karta husi ONU nian.

“Atu aumenta númeru partisipasaun iha misaun apoiu páz, ONU apoiu Polísia Nasionál Timor-Leste liuhusi kapasitasaun kona-ba lalaok ka kriteria oinsa teste ba apoiu páz nian,” nia hatete.