- Publika iha: 03 Janeiro 2024
Organizasaun Naun Governamentál (ONG) Belun, realiza formasaun ba joven arte marsiais no arte rituál sira atu hametin koñesimentu no kapasidade komunidade feto, mane, no joven inkluzivu ho kbiit ba prevene no responde ba konflitu.
Komandante Polisia Nasional Timor-Leste (PNTL), Munisipiu Dili, Superintendente Xefe Polísia Orlando Gomes hateten, Belun konvida PNTL atu disemina informasaun kona-ba papél polísia iha sosiedade nia le’t no kona-ba oinsá atua hasoru violénsia.
“Ohin sira konvida ha'u mai atu nune’e bele partilla informasaun ba ita-nia joven sira no komunidade sira, iha postu administrativa Vera Cruz [iha Dili] atu nune’e ita bele besik liu tan ba sira hodi fahe informasaun ba komunidade no joven sira kona-ba papél no funsaun polísia nian ne’e oinsá. Atu nune’e ita-nia joven sira no mós komunidade sira bele komprende servisu polísia nian di'ak liu tan,” komandante Gomes salienta.
Nia mós informa katak dala ruma komunidade ladún komprende servisu polísia nian no ida ne’e bele mosu dezentendimentu iha terenu tanba la iha komunikasaun, koordenasaun no kolaborasaun diak.
Iha fatin hanesan, reprezenta formadór husi ONG Belun Miguel Soares, hateten atividade formasaun refere kona-ba oinsá mak atu bele fahe informasaun ba komunidade sira kona-ba lei artes marsiais no lei armasbrankas no mós papél no responsabilidade PNTL nian hodi halo atuasaun ba situasaun ne’ebé mosu.
“Formasaun ida ne’ebé ohin ita halo iha Postu Administrativo Vera Cruz liuliu ba suco hitu ne'ebé pertense ba Posto Administrativo Vera Cruz nian, atu bele komprende di'ak liu tan ba informasaun sira ne’e. Depois sira bele lori ba hatutan no habelar tan ba sira nia komunidade sira seluk ne’ebé la bele mai partisipa iha formasaun ne’e,” nia haktuir.