Sexta, Março 01, 2024
Total visitors: 766366

Membru Parlamentu, Deputada Veneranda Lemos, liuhusi plenária hato’o parabéns ba feto pontensiál sira ne’ebé eleitu ona ba xefe suku iha períodu tinan 2023-2030, no husu atu serbí povu ho di’ak.

Membru Parlamentu, Deputada Veneranda Lemos, liuhusi plenária hato’o parabéns ba feto pontensiál sira ne’ebé eleitu ona ba xefe suku iha períodu tinan 2023-2030, no husu atu serbí povu ho di’ak.

Nia dehan prosesu eleisaun xefe suku ba segundu ronda ne’e la’o di’ak tebes, tanba governu rona no aplika sujestaun sira ne’ebé públiku hato’o katak, aumenta pessoal hodi fasilita hakerek naran eleitór nian atu evita ema forma iha liña naruk hanesan primeira ronda.

“Parabéns mós ba feto maluk sira ne’ebé eleitu, komunidade mak hili ita-bo’ot sira atu sai xefe suku tenke servisu ho di’ak no konta ho ami-nia apoia,” nia hateten liuhusi plenaria Parlamentu Nasionál.

Nia enkoraja xefe suku eleitu sira atu servisu makas serbí komunidade no lori sira ba moris di’ak, tanba komunidade fó ona fiar ba sira liuhusi eleisaun.

Entretantu, Deputadu Virgilio Pereira hato’o parabéns ba povu tomak ne’ebé konsege ezerse ona sira-nia direitu votu hodi hili xefe suku iha teritóriu tomak no husu xefe suku eleitu sira atu hala’o funsaun ho responsabilidade.

“Parabéns ba xefe suku eleitu sira, liu-liu iha Munisípiu Baucau. Ita-bo’ot sira hetan knaar husi povu liuhusi eleisaun, tanba ne’e ezerse imi-nia funsaun hodi atende povu hotu ne’ebé fó ona konfiansa votu ba ita-bo’ot sira,” nia hateten.

Iha parte seluk, Sekretária Estadu ba Igualdade, Elvina Sousa Carvalho, liuhusi publikasaun iha sosial media katak rezultadu eleisaun primeira ronda no segundu ronda hatudu feto na’in 18 mak eleitu ba xefe suku iha períodu 2023-2030.

Nia dehan dadus Komisaun Nasionál Eleisaun (CNE) katak total suku hamutuk 452, maibé 442 suku mak hili nia xefe suku foun, tanba suku 10 seluk konsidera suku foun. Entaun husi 442 suku ne’e, kandidatu hamutuk 2105 ne’ebé rejistu kompostu husi feto nain 241 (11%) no mane 1864 (89%).

Alende ne’e husi total 442 suku, provizoriumente rezultadu hatudu katak lideransa feto hamutuk nain 18 mak eleitu ba xefe suku. Xefe suku eleitu sira-ne’e mai husi Munisípiu Aileu nain haat, Ainaro nain ida, Baucau nain haat, Bobonaro nain ida, Covalima nain ida, Díli nain tolu, Ermera nain ida, Manatutu nain rua no Manufahi nain ida.

“Parabéns ba xefe suku eleitu sira liu-liu ba xefe suku feto. Povu hein ita bo’ot sira-nia servisu makas hodi dezenvolve ida-idak nia suku tuir kompromisiu ne’ebé hato’o ona liuhusi programa sira,” nia hato’o parabéns.

Nia konsiente rezultadu eleisaun suku períodu ida ne’e númeru xefe suku feto ne’ebé eleitu tun tanba iha períodu tinan 2016-2023, xefe suku feto nain 21 (5%).

Nia hateten SEI nafatin ekoraja no promove partisipasaun lideransa feto sira iha nivel foti-desizaun tantu nasionál no lokal. No Esperiénsia ne’ebé lideransa feto sira hetan iha eleisaun xefe suku períodu ne’e nafatin sai lisaun no preferensia ba lideransa feto ho pontensialidade sira atu hakas aan nafatin labele dezamina no iha protidaun nafatin atu kompete no okupa iha kualker pozisaun foti desizaun.