Sexta, Março 01, 2024
Total visitors: 766366

Ministru Agrikultura, Pecuária, Pesca no Floresta (MAPPF), Marcos da Cruz hateten Konsellu-Nasionál Seguransa Ai-han no Nutrisaun Timor-Leste (KONSSANTIL) aprova ona suku Afaça iha postu administrativu Quelicai, Munisípiu Baucau, suku Daudo iha postu administrativu Cailaco, Munisípiu Bobonaro no suku Fahinehan iha postu administrativu Fatuberliu, Munisípiu Manufahi sai pilotu ba implementasaun programa intervensaun ba kombate hamlaha no malnutrisaun.

Ministru Agrikultura, Pecuária, Pesca no Floresta (MAPPF), Marcos da Cruz hateten Konsellu-Nasionál Seguransa Ai-han no Nutrisaun Timor-Leste (KONSSANTIL) aprova ona suku Afaça iha postu administrativu Quelicai, Munisípiu Baucau, suku Daudo iha postu administrativu Cailaco, Munisípiu Bobonaro no suku Fahinehan iha postu administrativu Fatuberliu, Munisípiu Manufahi sai pilotu ba implementasaun programa intervensaun ba kombate hamlaha no malnutrisaun.

Nia dehan bazeia ba asesmentu hatudu suku tolu ne’e nia kondisaun infrastrutura bazika laiha, liu-liu laiha asesu ba bee moos, estrada no eletrisidade. No komunidade nia produsaun agrikola mós menus tebes, tanba ne’e presiza atensaun másimu atu mellora kondisaun moris komunidade nian.

“Ohin ne’e enkontru primeru KONSSANTIL nian atu revitalize no re-ativa konselho ne’e nia servisu ba oin diak liu tan intermus kordenasaun, servisu hamutuk interministerial no implementa atividade integradu iha suku tolu ne’e. Depois halo avaliasaun ba tan suku seluk,” nia hateten hafoin partisipa iha KONSSANTIL nian iha salaun City 8 Manleuana, Díli.

Nia hateten setór agrikultura, atividade intervensaun ne’ebé halo mak identifika rekursu bee matan iha suku sira ne’e, halo asaun protese no konserva bee matan sira ho kuda ai-oan no apoia halo jestaun ba bee matan sira ne’ebé sei moris hodi fornese ba agrikultor sira halai natar, kuda modo, hakiak ikan.

Ministru orienta mós servisu agrikultór munisípiu sira atu identifika natar sira ne’ebé abandona no buka tuir fonte bee hodi kee bee dalan atu fornese bee ba natar.

Nia informa KONSSANTIL ne’e estabelese iha tinan 2010, bainhira aprova deklarasaun Comoro kona-ba zero hamlaha no nutrisaun. Ekipa ne’e nia papel atu halo koordenasaun servisu interministerial ba kombate hamlaha no hadia estadu nutrisaun populasaun nian.

Tuir relatoriu analiza klasifikasaun integradu ba seguransa ai-han iha Timor-Leste iha tinan 2019, hatudu 36% populasaun enfrenta inseguransa ai-han krónika. No dadus peskiza ai-han no nutisaun tinan 2020, hatudu labarik tinan lima mai kraik 47% sofre malnutrisaun krónika raes badak.

Entretantu, Pessoal Apoia Suku, iha Suku Fahinehan, postu administrativu Fatuberliu, Munisípiu Manufahi, Cipriano Vasco hateten fonte ekonomia ne’ebé sira hetan maioria husi agrikultura. Maibé sira difisil asesu ba merkadu atu faan sira-nia produtu.

“Ami iha merkadu ida, maibé distánsia dook husi Same. Ami husi kapital Same ba suku kuaze 20 km, tanba ne’e ami-nia merkadu ladun funsiona,” nia hateten.

Nia informa totál xefe família iha suku Fahinehan hamutuk 347 ho populasaun 2006, kompostu husi feto 1035 no mane 991.

Iha parte seluk, Administradór Munisípiu Manufahi, Arantes Isaac Sarmento hateten agradese suku Fahinehan sai alvu ba implementasaun programa integradu KONSSANTIL nian tanba bele hetan atensaun másimu husi nasionál ba atividade sira empoderamentu sosial, dezenvolvimentu setór agrikola, setór infrastrutura bazika no atendimentu saúde.

“Ha’u hanoin progressu ne’ebé la’o ona iha Suku Fahinehan mak suku hamutuk ho ekipa integradu no munisípiu halo ona planu asaun anuál. Iha planu ne’e mensiona kondisaun infrastrutura bázika sai prioridade, tanba bee laiha, estrada kondisaun ladiak komunidade labele asesu ba merkadu,”nia hateten.

Nia espera suku Fahinehan bele iha konsentrasaun no atensaun másimu husi ministériu relevante sira hodi rezolve problema sosial no ekonomia ne’ebé komunidade enfrenta.