Autoridade Munisípiu Ermera no Viqueque Fo Prioridade Hadia Estrada

Autoridade munisípal Ermera no Viqueque fo prioridade ba setór infrastrutura bazika, liu-liu hadia estrada iha munisípiu laran atu fasilita movimentu populasaun nian hodi halao atividade negósiu ba sustentabilidade rendimentu familia nian.

Presidente Autoridade Munisípiu Ermera, José Martinho dos Santos Soares hateten governu iha planu atu hadia estrada no planu munisípiu nian tama hotu ona iha planu asaun annual no iha mos parseiru dezenvolvimentu sira ne’ebé hakarak investe iha infrastrutura, liu-liu estrada.

“Estrada diak ne’e husi Dili ba Gleno deit, maibe ida ne’e mos tinan tolu ona la halo manutensaun kondisaun ladun diak komesa nakfera ona. Agora husi Gleno ba Ermera sidade antiga no ba Letefoho to’o Atsabe ne’e kondisaun grave liu,” nia hateten bainhira partisipa iha Forum Konsultasaun Planu Asaun Nasionál Kombate Stunting, iha salaun City 8 Manleuana, Dili.

Nia hateten estrada diak oituan mak husi Ermera ba postu Hatulia tanba foin dadaun mak kompañia husi Xina, Sanghi Construction halo, maibe iha tempu udan rai halai dificulta movimentu transporte nian tanba ne’e importante tenke iha manutensaun atu asegura nafatin.

Alende ne’e, prioridade seluk mak eletrisidade, bee moos, saúde, edukasaun no setór agrikultura, liu-liu hasa’e produsaun produtu Kafe tanba iha tinan rua ba kotuk produsaun tun 14 toneladas tanba mudansa klimatika afeta produsaun menus no kualidade tun.

“Agrikultura Presidente Republika husu atu hasa’e produsaun kafe no kualidade kafe tanba kafe mak sai produtu primadona ita nian, ne’ebe ami agora tau matan hela ba ida ne’e halo rehabilitasaun,” nia hatutan.

Iha parte seluk, Administrador Munisípiu Viqueqeu, Januario Soares hateten infrastrutura estrada sai nafatin prioridade tanba kondisaun estrada tantu iha area urbanu no rural ladiak dificulta movimentu populasaun sira nian.

Nia fo ezemplu estrada Lugatoi to’o agora kondisaun ladiak risku bo’ot rai halai halo estrada besik kotu tanba ne’e kareta no motor barak mak hetan asidente baku fila iha fatin ne’e.

“Hodibainhira ami ba mos halai husi mota laran no hodiseik ami mai atu tuir enkontru ida ne’e mos ami liu mota laran, signifika kuandu tempu udan mota bo’ot labele liu no seidauk udan ami tenke halai lalais tanba udan tun ita labele fila ona,” nia hateten.

Nia hateten sira loke ona dalan alternativa, maibe subida entau fo risku ba transporte bo’to sira lori todan tanba ne’e sira hato’o ona ba nasionál atu hadia dalan alternativa ne’e hodi fasilita movimentu transporte nian.