Domingo, Abril 21, 2024
Total visitors: 766366

Ministériu Edukasaun (ME) servisu hamutuk ho Millenium Challenge Corporation (MCC) iha Timor-Leste fó formasaun metodolojia ensinu ba kandidatu professór sira hamutuk na’in 234.

Ministériu Edukasaun (ME) servisu hamutuk ho Millenium Challenge Corporation (MCC) iha Timor-Leste fóformasaun metodolojia ensinu ba kandidatu professór sira hamutuk na’in 234.

Ministra ME Dulce de Jesus Soares dehan ema ne’ebé atu sai professor tenke iha preparasaun di’ak hodi nune'e bele tama ba forsa de traballu iha ministériu hodi transforma siénsia ba estudante sira.

Nia dehan, dadaun ne'e ME, halo ona kooperasaun ho MCC iha Timor-Leste hodi prepara kapasidade kandidatu professór ka futuru professór sira.

"Ita halo formasaun kona-ba metodolojia ensinu ba kandidatu professór sira hamutuk na’in 234 ne’ebé finalista husi Universidade Nasional Timor-Lorosa'e (UNTL)," Ministra Soares dehan iha Vila-Verde.

Nia dehan, formasaun ne'e hodi prepara sira-nia mentalidade no hasa'e sira nia koñesimentu kona-ba metodolojia ensinu nune'e mós pedagojia nian, tanba atu sai futuru professór presiza prepara.

"Ita halo formasaun ne'e, tanba ita iha ona planu prioridade hodi rekruta professór sira, nune'e bele koloka ba eskola sira ne’ebé identifikadu menus professór.

Dadaun ne'e ita hahú investe ona hodi fó formasaun ba kandidatu professór sira nune'e mós ba Professór atual balun ne’ebé presiza duni tuir tan formasaun kona-ba materia espesífiku sira," nia dehan.

Entretantu, Koordenadór Timor-Leste Coalition for Education (TLCE), Jose Alexandre, dehan ministériu iha planu prioridade hodi rekruta tan professór ne'e primeiru presiza rezolve uluk professór kontratadu sira ne’ebé to'o ohin loron eziji hela sira-nia estatutu.

"Ita husu bainhira iha prosesu formasaun ba kandidatu professór sira, ministériu mós tenke kria polítika ida ne’ebé razoavel hodi rezolve problema professór kontratadu sira, nune'e mós haree ba professór sira ne’ebé idade tama ona reforma," nia dehan.

Nia dehan, atu nune'e kandidatu professór sira husi finalista UNTL ne’ebé partisipa iha formasaun bele iha oportunidade hodi troka professór sira ne’ebé idade labele ona hodi hanorin no presiza reforma hodi deskansa.