- Publika iha: 15 Novembro 2023
Diretór Ezekutivu Fundasaun Mahein (FM), Nelson Belo, dehan konflitu sira ne’ebé akontese iha rai-laran,ne'e tanba kauza husi la iha kampu servisu ba joven sira.
Nia dehan, bainhira kampu servisu iha ba joven sira, maka konflitu sei la akontese tanba ema hotu sibuk no nia servisu, no la iha hanoin hodi kria konflitu.
"Ita konsidera katak konflitu sira ne’ebé akontese durante ne'e nia kauza loloos mak la iha kampu servisu ba joven sira," nia dehan.
Tanba ne'e atu solusiona no prevene konflitu iha rai-laran presiza kria kampu traballu ba joven sira tantu iha rai-laran nune'e mós rai-liur.
"Ita husu governu no estadu Timor-Leste tenke kria kampu traballu ba joven sira, iha rai-laran nomós kontinua buka dalan ho nasaun parseria sira nune'e bele fó oportunidade ba ita-nia joven sira ba servisu nune'e bele hadia ekonomia família nian no bele kontribui ba dezenvolvimentu nasional. Ida ne'e mak solusaun," Diretór Belo dehan iha knar fatin.
Nia dehan, la’ós mosu kolflitu iha fati-fatin haruka polísia ba halo atuasaun ne'e la’ós solusaun, tanba bainhira polísia ba halo intervensaun hotu sira kontinua fali ida-ne'e mak sempre akontese durante ne'e.
"Ita husu ba Nonu Governu atu realiza programa polítika sira kona-ba kria kampu servisu ba joven sira, la’ós koalia de’it iha palku, maibé tenke realiza," nia husu.
Tanba ne'e nia dehan, durante sira-nia observasaun ba konflitu sira ne’ebé akontese ne'e iha joven barak mak lakon vida no nune'e mos kanek no tohar, tanba ne'e governu tenke buka solusaun.
Entretantu, Sekretáriu Estadu Polítika Formasaun Profisional no Empregu (SEFOPE), Rogerio Araújo Mendonça, dehan kriasaun kampu servisu ba joven sira-ne'e dadaun ne'e governu investe hela iha sentru formasaun profisional sira hodi fo formasaun ba joven sira oinsa bele kria rasik kampu servisu ba sira nia an nune'e mós ba ema seluk.
"Durante ne'e ita apoiu ona grupu kreativu no sentru formasaun profisional sira hamutuk 37 iha rai-laran, maibé ita rekoñese katak ida-ne'e seidauk sufisiente, maibé nafatin esforsu atu bele solusiona," nia dehan.
Enkuantu nia dehan, kona-ba servisu iha rai-liur ne’ebé durante ne'e governu fasilita mak Corea no Australia, dadaun ne'e iha tan negosiasaun ho nasaun parsera balun hodi bele haruka tan joven sira ba servisu hodi hadia moris.