Domingo, Abril 21, 2024
Total visitors: 766366

Ministru Interior (MI), Francisco da Costa Guterres rekoñese partisipasaun feto iha Polisia Nasionál Timor-Leste (PNTL) sei menus 15%, maibe sira nia kontribuisaun ba hari pás no protesaun seguransa signifikante tebes tanba ne’e, sira diskute ona iha rekrutamentu membrus foun tinan 2024, kouta ba feto 20%, entau enkoraja feto sira atu hola parte.

Ministru Interior (MI), Francisco da Costa Guterres rekoñese partisipasaun feto iha Polisia Nasionál Timor-Leste (PNTL) sei menus 15%.

Nia dehan kouta ne’e meus ida ne’ebé sira aplika hodi hasa’e presentajen feto iha setór seguransa nian husi 15% ba 30%.

“Ita koalia konaba feto iha PNTL, mesmu pursentajen ki’ik foin 15%, maibe sira nia partisipasaun iha setór seguransa ne’e makas tebes no sira dezenvolve sira nia kareira agora ne’e lalais tanba sira kompete ho mane sira konsege sa’e,” hateten hafoin partisipa iha serimonia lansamentu PAN 1325 konaba feto pás no seguransa jerasaun daruak iha Hotel Timor, Dili.

Nia hateten partisipasaun feto iha PNTL diak liu kompara ho feto iha F-FDTL tanba F-FDTL foin iha kapitaun feto ida, maibe PNTL iha ona feto koronel senhor nain ida ona, tanente koronel nain tolu no maijor ne’e sira barak.

Nia hatutan feto barak mos tur iha kargu foti desizaun hanesan komanante munisípiu, diretóra, xefe departamentu, xefe unidade no komadante squadra tanba feto iha kapasidade no abilidade atu kontribui ba dezenvolvimentu setor seguransa.

Nia haktuir prepasaun ba rekrutamentu membru PNTL foun hahu ona ho estabelese komisaun, estabelese kriteria, ekipa halo teste, ekipa saúde atu halo teste ba kandidatu sira.

Nia garantia prosesu rekrutamentu sei lao ho transparante tanba involve ema barak iha ekipa laran inklui GNR husi Portugal.

Iha parte seluk, Xefe Gabinete Jéneru, iha PNTL, Inspektora Xefe Polisia Maria Fátima Marins hateten PNTL nudar autor save ba pilar hat iha PAN 1325 nian atu promove partisipasaun feto iha pás no seguransa tanba peskiza konaba prestasaun seguransa iha tinan 2022, hatudu 90% komunidade prefere iha ajente polisia feto barak liu tan hodi serbi komunidade.

Nia dehan ho apoiu husi UN Women, sira dezenvolve hela planu estratejiku jéneru nian atu promove feto nia partisipasaun iha lideransa no fortalese kapasidade polisia feto sira nian iha asuntu sira espesifiku.

“Durante hau nia servisu ho PNTL no misaun ONU hau bele hare katak ajente polisia femenina lori abordajen uniku mai ho servisu ne’ebe ho karakteristiku husi experensia moris, empatia, inkluzaun. Ajente polisia femenenina iha abilidade atu hamenus skalaun konflitu ka situasuan ne’ebé potensial hamosu konflitu liu husi komunikasaun ativu no komprensaun,” nia hateten.

Nia rekoñese iha inisiu tinan 2004, sai nudar membru PNTL, atensaun no apoiu ne’ebé limitadu tebes ba feto sira. Maibe feto sira servisu makas hodi prova kontribuisaun feto nian signifikante tebes ba promove pás, hari sosiedade seguru no resilente liu tan.

Nia haktuir iha tinan 2015 até 2017, halao misaun ONU konaba manutensaun ba paz iha nasaun Cosovo no iha tinan 2020 até 2022, halao misaun inklui iha nasaun South Sudan.