Quinta, Julho 18, 2024

Estudante Departamento de Inclusão Comunitária e Social (DICS), Faculdade de Ciências Sociais, Univeridade Nacional Timor Lorosa’e (UNTL) preokupa la iha dosente ba Letra Braille no Jestual, hodi difikulta estudante sia ho kondisaun difisiensia tilun no matan hodi tuir prosesu aprendizajem ho di’ak.

Estudante DICS, Natalino Tilman, hateten katak menus dosente ba letra braille susar ba maluk difisiensia tilun no matan atu aprende ho di’ak.

Estudante DICS, Natalino Tilman, hateten katak menus dosente ba letra braille susar ba maluk difisiensia tilun no matan atu aprende ho di’ak, alende ne’e dezafiu seluk mak falta asesibilidade hanesan rampa ka dalan ba difisiente ain sira.

“Hanesan ha’u-nia kolega defesiensia matan sira uza telefone rekaman [grava], no fila ba uma loke fila fali rona hodi hakerek. Se hanesan ha’u-nia maluk lian jestual sira presiza nia maluk sira ajuda halo tradusaun, tanba professór sira la iha,” nia dehan.

Estudante Natalino husu parte relevante sira ihia UNTL atu tau atensaun lalais ba sira, tanba difikuldade ne’ebé iha hanesan menus asesibilidade no la iha dosente ba letra braille, difikulta sira tuir prosesu aprendizajen iha UNTL ho diak.

“Ha’u husu asosiasaun sira no [ministerio] ensinu superior sira atu tau matan lalais mai ami-nia problema ne’e, tanba kolega sira husi ano letivu 2023 to’o 2024 maioria defisiensia tilun no matan. Nune’e ami-nia kolega sira-ne’e bele aprende ho di’ak,” nia dehan iha Kampus Kaikoli, Díli.

Iha sorin seluk, Diretór Asosiasaun Defisiensia Timor Leste (ADTL), Cesário da Silva husu ba parte UNTL atu mellora fasilidade ba ema ho difisiensia sira hodi fó espasu ba sira atu livre hala’o estudu.

“UNTL tenki mellora fasilidade sira ba ema ho kondisaun difesiente, liuliu espasu ba ema ho difisiensia sira livre no bele estuda, tanba ema ho difisiente sira ba halo estudu presiza kondisaun no fasilidade ne’ebé diferente,” nia dehan.

Nia mós salienta, UNTL hanesan universidade estadu nian ne’ebé tenki iha duni kondisaun ne’ebé di’ak, liuliu fasilidade ba estudante defisiente sira bele iha asesibilidade no dosente sira mós tenke mellora sira-nia koñesimentu.

“Dosente sira mós presiza mellora sira-nia koñesimentu oinsa atu halo atendimentu ba ema sira ne’ebé espesial ne’e,” nia dehan.