Terça, Maio 21, 2024
Total visitors: 766366

Diretór Nasionál Empregu Estranjeiru, iha Sekretária Estadu Formasaun Profesionál no Empregu (SEFOPE), João Correia Pereira husu ba traballadór sira tenki kuidadu aan bainhira halo servisu iha ema-nia rai, tanba iha estranjeru ne'e la'ós servisu kmaan, maibé servisu todan tebes, no servisu tuir oras.

Diretór Nasionál Empregu Estranjeiru, iha Sekretária Estadu Formasaun Profesionál no Empregu (SEFOPE), João Correia Pereira husu ba traballadór sira tenki kuidadu aan bainhira halo servisu iha ema-nia rai.

"Ita mós tenki hatudu atitude ne’ebé di’ak iha ema nia rain, atu nune’e bele sai ezemplu ba sira seluk ne’ebé mak buka hela dalan atu tuir ba. Ita mós tenke haka'as an, tenke dezenvolve an ho oportunidade ne'ebé ita iha, labele lakon oportunidade.

Tanba ita-nia kondisaun saúde bele ohin di'ak, bele aban la di'ak tuir ita-nia idade ne'ebé avansadu ona, tanba ne’e tenki kuida mos imi-nia an bainhira halo servisu," nia hateten hafoin partisipa serimónia despedida ho traballadór na'in 32 atu ba Australia, iha Pantaikelapa, Díli.

Nia dehan, servisu iha estranjeru ne'e la'ós servisu kmaan, maibé servisu todan tebes, servisu tenki tuir oras, tanba ne'e ba sira ne'ebé foun tenke haka'as an atu hodi halo servisu ho di'ak.

“Servisu no moris iha estranjeiru ne'e, ema seluk sei la ajuda, tanba ne’e kuidadu imi-nia aan, bainhira ba iha ne'ebá tenke hatene halo tuir mós regra ne’ebé ema fó,” nia hatutan.

Iha parte seluk, traballadór Nelson Martins dos Santos hateten, maské ema dehan servisu iha Australia servisu ne’ebé todan, maibé hanesan traballadór prontu atu servisu maske ne'e todan, tanba ida ne'e oportunidade di'ak ne'ebé SEFOPE fó, No. nia kompromete hanesan traballadór prontu de'it atu servisu.

"Ha’u sente kontente, tanba ha'u bele hetan oportunidade ida-ne'e husi SEFOPE hodi ba servisu iha Australia, tanba ne'e ha'u prontu atu servisu, maski servisu ne'e ema barak dehan todan tanba kona-ba produsaun naan, kona-ba karau no bibi, maibé ha'u prontu atu servisu, no la'o tuir regulamentu ne’ebé kompañia fó no regulamentu husi SEFOPE nian," nia haktuir.

Nia informa tan, kontratu ne'ebé kompañia fó sira nu’udar traballadór, durante tinan 4, tanba ne’e hakarak ka lakohi tenke esforsu an hodi servisu ho di’ak, atu nune’e kompañia ne’e nafatin tau fiar ba traballadór Timoroan sira.

“Atu todan oinsá nu’udar traballadór kumpri regra sira ne’ebé iha, ho prinsipiu katak fila hikas mai Timor-Leste, sei halo netik buat ruma ba família, nomós bele hamenus dezempregu iha Timor,” nia hatete.