Quinta, Julho 18, 2024

Diretór Ezekutivu Centru Logistika Nasionál (CLN), Jacinto Paijo hateten governu anterior inisia ona kria lei fortifikasaun aihan, maibe la konsegue finaliza tanba ne’e governu atual tenke kontinua konsidera baze legal no regulamentu sira konaba fortifikasaun aihan nian hodi bele implementa atu kontribui ba kombate malnutrisaun iha rai laran.

Diretór Ezekutivu Centru Logistika Nasionál (CLN), Jacinto Paijo hateten governu anterior inisia ona kria lei fortifikasaun aihan, maibe la konsegue finaliza.

Nia dehan tenke asegura uluk lei no regulamentu sira hodi sosializa ba liña ministeriu sira no aloka orsamentu hodi implementa tanba fortifikasaun aihan ne’e intervensaun ida ne’ebé importante atu kombate malnutrisaun.

“Buat ida fortifikasaun ne’e mundialmente iha modelu tolu mak obrigatoriu, voluntariu no rekomendasaun. Maibe Ita nia situasaun ne’e ita bele implementa obrigatoriu atu aihan sira ne’ebé distribui ba merkadu tenke fortifika ona,” nia hateten bainhira partisipa workshop nasionál joint annual assessment iha salaun City 8 Manleuana, Dili.

Nia hateten sira iha ona ideia ba fortifikasaun aihan, maibe atu implementa ida ne’e governu tenke investe.

Nia hateten malnutrisaun ne’e problema nasionál ne’ebe governu tenke konsidera no investe hodi fortifika aihan sira molok distribui ba merkadu ba konsumu nasionál.

Entretantu, Diretór Jéral Institutu Nasionál Saúde Públika, Doutor Frederico Bosco hateten fortifikasaun aihan ne’e importante no nesesariu atu ajuda redus taxa malnutrisaun tanba aihan ne’ebé komunidade sira konsumu kontein ona nutriente ne’ebé bele rekere ba isin.

“Fortifikasaun ba aihan sira ne’e importante tebes atu garantia hahan sira ne’ebé ita nia komunidade sira konsumu ne’e iha nutriente ne’ebé rekere ba isin,”

“Politika ida ne’e agora dadaun governu adopta laos deit husi ministeriu kompetente, maibe ministeriu saúde mos iha hanoin katak atu muda ita nia estatutu nutrisaun komunidade nian diak liu dalan ida mak liu husi fortifikasaun ba aihan sira,” nia hateten.

Nia hateten tinan ida ne’e iha atividade peskiza barak ne’ebé sei halo inklui mos peskiza ba nutrisaun nian atu hare situasaun no fator ne’ebé influensia estatutu nutrisaun komunidade sira nian.

Nia hatutan rezultadu peskiza sira ne’e mak sei hamosu rekomendasaun no kriteriu sira ba governu tau iha konsiderasaun atu implementa.