Sexta, Março 01, 2024
Total visitors: 766366

Diretóra Jeral Servisu Imigrasaun Inspetora Xefe Polisia Adelaide da Rosa informa iha fulan-janeiru tinan 2024, sira deporta fila sidadaun estranjeru na’in 13 husi total na’in 40 ne’ebé viola vistu ba sira nia nasaun orijen. Sidadaun sira ne’e maioria husi nasaun viziñu Indonesia.

Diretóra Jeral Servisu Imigrasaun Inspetora Xefe Polisia Adelaide da Rosa informa iha fulan-janeiru tinan 2024, sira deporta fila sidadaun estranjeru na’in 13 husi total na’in 40 ne’ebé viola vistu ba sira nia nasaun orijen.

Nia dehan sira ne’e haruka fila tanba sira laiha duni meus kontinua sustenta moris iha ne’e, sira ne’e inklui sira ne’ebé faan sasan ambulante iha sidade laran halo kapturasaun laiha meus moris entau halo kordenasaun ho embaixada sira aprezensa kondisaun no haruka sira fila.

“Husi ema na’in 40 ne’e ita halo abandona voluntariu ba ema na’in 13 ne’ebé maioria husi nasaun viziñu ne’ebé sira halo violasaun vistu. Depois ita halo abandona voluntariu ba sira ita haruka fila ho pena ne’ebé mak fo ba sira bandu ba sira labele tama mai teritorio nasionál durante tinan tolu nia laran,” nia hateten iha servisu fatin Caicoli, Dili.

Nia hateten sira seluk ne’ebé prosesu administrativu lao hela katak submete ona dokumentu atu legaliza sira nia vistu adekuadu kontinua prosesu, maibe sira nafatin kona sansaun koima ka selu multa tanba sira uza vistu turista halo servisu.

Nia rekoñese prosesu trata vistu servisu lori tempu oituan tanba involve institusaun seluk hanesan Sekretariu Estadu Formasaun Profesional no Empregu (SEFOPE) atu emite autorizasaun, entaun sempre konsidera.

Nia hateten sidadaun estranjeru sira ne’eb’e tama mai ho rekezitu kompletu atu trata vistu trabalho ho agensia ka kompañia ne’ebé servisu ba, sira garantia antes vistu turista remata iha loron 30 nia laran sidadaun sira ne’e bele hetan ona vistu trabalho.

Nia haktuir reseita ne’ebé servisu imigrasaun rekolha iha fulan-janeiru tinan 2024, husi atividade emisaun vistu, extensaun vistu no produsaun autorizasaun residensia sira hamutuk $100,000 resin.

Iha parte seluk, Diretór Organizasaun Fundasaun Mahein, Nelson Belo hateten dalabarak sidadaun estranjeru sira ne’e viola vistu tanba prosesu tratamentu ba vistu trabalho ne’ebé lao kleur.

“Ami rekomenda atu halo revizaun ida konaba prosesu hetan vistu ne’e. Que sira mai iha ne’e mak aplika, diak liu sira iha ne’eba aplika kedas no sira hetan ona vistu iha sira nia rai mak sira tama mai ne’e fasil. Ne’ebé bele halo online tanba agora mundu digitalizadu,” nia rekomenda.

Nia hateten agora dadaun vistu servisu tenke mai trata iha Timor, entau obrigado sidadaun estranjeiru sira mai ho vistu turista to’o iha ne’e prosesu ba vistu servisu lao kleur automatikamente viola vistu.