Kareta Ida Tenke Rekolha Lixu Karada Tolu Kada Loron

Diretór Servisu Agua, Saneamentu no Ambiente iha Munisípiu Dili, Domingos Godinho hateten tuir kontratu ne’ebé sira halo ho kompañia sira rekolha lixu iha sidade Dili, katak kamioneta ida rekolha deit lixu karada tolu lori ba lixeira Tibar. Tanba ne’e, kuantidade lixu barak la konsege rekolha hotu iha loron.

Nia dehan governu kontratu kareta hamutuk 50 ho pessoal saniamentu inklui motorista hamutuk nain 250, liu-liu kada kareta ema nain lima atu rekolha lixu no tula ba lixeira Tibar.

“Bazeia ba kontratu ne’ebé iha katak kada loron tenke raut foer ret tolu deit, se lixu sei iha mak sei kontinua fali iha aban,” nia hateten iha servisu fatin Matadoru, Dili.

Nia hateten dalaruma sira husu ekipa saneamentu rekolha no tula lixu karada hat iha loron ida, liu-liu bainhira halo limpeza jeral tanba lixu barak. Maibe karada ida ne’e diskontu katak loron tuir mai sira raut deit karada rua.

Nia hatutan servisu ne’ebé sei manual, entau hat tempu oras tolu até hat mak rekolha lixu karada ida no transporta ba lixeira Tibar.

Nia haktuir kamioneta 50 ne’e nia kontratu sei termina iha dia 31 fulan-marsu tinan 2024, maibe depende ba nesesidade tanba planu sistema melloramentu rekolha lixu sei operasionaliza iha fulan-abril tinan 2024.

Iha parte seluk, Xefe Suku Motael, Luis Antonio Candido Gusmão Viegas hateten kamioneta ne’ebé rekolha lixu ne’e orario la fiksu, bele loron rua to’o tolu mak mai raut foer.

“Problema ba ami mak ne’e orario rekolha lixu mak la fiksu, buat ne’ebe ita hare loron ida mai foti no loron tuir mai la mai. Entau ita bele dehan iha semana ida rekolha lixu dala hat,” nia hateten.

Nia hateten komunidade iha suku Motael barak mak iha ona konsiensia atu halo jestaun ba lixu tanba iha tinan 2023, suku ne’e hetan sertifikadu apresiasaun husi autoridade Dili nudar suku moos.

Nia haktuir total populasaun iha suku Motael hamutuk 6900 ho xefe uma kain hamutuk 1600.