Sexta, Março 01, 2024
Total visitors: 766366

Governo Nova-Zelandia liuhusi Embaxada iha Timor-Leste apoiu Ministériu Edukasaun (ME) konstrui ona fatin Ensino Pre-Eskolár hamutuk 123 iha teritóriu laran tomak.

Governo Nova-Zelandia liuhusi Embaxada iha Timor-Leste apoiu Ministériu Edukasaun (ME) konstrui ona fatin Ensino Pre-Eskolár hamutuk 123 iha teritóriu laran tomak.

Embaxadór Nova-Zelandia iha Timor-Leste, Philip Hewitt hatete ensino pre-eskolár inklui fatin halimar ba labarik sira, hahu husi idade 3-5 anos nian.

"Nova-Zelandia servisu hamutuk ho Ministériu Edukasaun hodi apoiu konstrui tan pre-eskolár hamutuk 123 no kompleta ho fasilidade iha teritóriu laran tomak," nia dehan.

Nia dehan, pre eskolár ne'e hanesan programa halimar, aprende no deskobre susesu, tanba ne'e Ensino pre-eskolár importante tebes ba labarik sira.

"Dezenvolvimentu pre-eskolár ne’e importante tebes ba futuru nasaun nian, tanba harii fundasaun ida ne’ebé metin ba dezenvolvimentu labarik nian, tanba ho edukasaun sedu ne’ebé kualidade as sei promove abilidade koñesimentu sosial no emosional hodi lori rezultadu akadémiku ne’ebé diak liu," nia dehan.

Nia dehan konstrusaun ba pre-eskolár ne'e kolaborasaun besik ho programa nasionál dezenvolvimentu suku, no konsegue finaliza projetu konstrusaun ba pre-eskolár 123 iha teritóriu laran.

Iha fatin hanesan Ministra ME Dulce de Jesus Soares dehan, konseitu husi pre-eskolár mak aprende liuhusi halimar atu iha preparasaun antes hakaat ba klase 1 ensinu báziku.

"Ita agradese tebes ba governu Nova Zelandia hanesan amigu diak Ministériu Edukasaun nian ne’ebé mak konstrui pre-eskolár hamutuk 123, fasilita ita-nia labarik idade 3 no 5 anos sira aprende," nia dehan.

Tanba ne'e nia dehan, Ministériu nafatin husu parseria Nova-Zelandia nia tulun hodi apoiu dezenvolvimentu iha área edukasaun.